Sýret: primeminister.kz
Densaýlyq saqtaý mınıstrliginiń málimetinshe, byltyr qyzylshaǵa shaldyǵý deńgeıi 2024 jylmen salystyrǵanda 85%-ǵa tómendegen. Sonymen qatar jyl basynan beri el aýmaǵynda qyzylshanyń 1,9 myń jaǵdaıy tirkelgen. Aýrýshańdyqtyń eń joǵary kórsetkishteri Astana men Almaty qalalarynda, sondaı-aq Jambyl jáne Atyraý oblystarynda baıqalady. Atalǵan jaǵdaılardyń basym bóligi 5 jasqa deıingi balalar arasynda tirkelgen. Aýrýǵa shaldyqqandardyń kópshiligi – vaksına almaǵan balalar. Onyń ishinde ekpeden bas tartý sebepti egilmegender de bar.
Keńes barysynda qyzylsha aýrýy kóp tirkelgen óńirlerdiń ákim orynbasarlary jaǵdaı týraly esep berdi.
Premer-mınıstrdiń orynbasary óńirlik shtabtar deńgeıinde qyzylsha boıynsha epıdemıologııalyq ahýaldy kún saıyn taldap otyrýdyń mańyzdylyǵyn atap ótip, jergilikti jerlerdegi basshylardyń jeke jaýapkershiligine erekshe nazar aýdardy.
Sondaı-aq profılaktıkalyq ekpemen qamtý máselesi jeke qaraldy. Birqatar óńirde josparly kórsetkishterge qol jetkizilmegeni aıtyldy. Ásirese Mańǵystaý oblysynda negizgi vaksınalardyń barlyq túri tómen deńgeıde qalyp otyr. Mundaı alshaqtyqtar ınfeksııalyq aýrýlardyń taralý qaýpin kúsheıtetindikten, bastapqy medısınalyq-sanıtarlyq kómek deńgeıinde nysanaly ári júıeli jumysty kúsheıtý qajettigi atap ótildi.
Keńes qorytyndysynda Aıda Balaeva qyzylshaǵa qatysty epıdemıologııalyq ahýaldy erekshe baqylaýǵa alýdy, sondaı-aq halyq arasynda ımmýndaýdyń mańyzdylyǵy týraly aqparattyq-túsindirý jumystaryn jandandyrýdy tapsyrdy. Bul baǵyttaǵy jumysty, eń aldymen, Mańǵystaý oblysynda kúsheıtý qajet ekeni aıtyldy.
