«Qazaqstan temir joly» ulttyq kompanııasy» AQ vıse-prezıdenti Erik Imashev baspanaly bolǵan jastardy arnaıy quttyqtap, shaǵyn jataqhananyń qutty qonys bolýyn tiledi. «Búginde kompanııa eńbekkerlerin áleýmettik-turmystyq turǵydan qamtý durys jolǵa qoıylǵan. Búgingi qýanyshty jaǵdaı – bolashaq temirjolshylardy daıarlaý men mamandardyń biliktiligin kóterýde ulttyq kompanııanyń korporatıvtik saıasaty durys ekendiginiń bir kórsetkishi», dedi vıse-prezıdent.
«QazKKA» AQ rektory Baqytjan Qýanyshevtiń aıtýynsha, memleket tarapynan bilim salasyna kóńil bólinip, onyń ishinde ekonomıkalyq ósimge baılanysty orta býyn mamandardy daıarlaýǵa basymdyq berilip jatqan ýaqytta bilim berý salasynda qyzmet etip júrgen oqytýshylardyń baspanamen qamtamasyz etilýi jaǵymdy jańalyq.
Qýanysh ıeleri óz kezeginde QazKKA men ulttyq kompanııa basshylyǵyna alǵys aıtty. «О́te jaıly turǵyn úıge ıe boldyq. Janymyzda park bar. Irgemizde Esentaı ózeni aǵyp jatyr. Jas qyzmetkerler men shaǵyn otbasylardyń turýyna óte qolaıly», – deıdi Radıotehnıka jáne kommýnıkasııa kafedrasynyń oqytýshysy Dına Aqtaılaqova.
Aıta ketý kerek, qazirgi tańda QazKKA stýdentteri men magıstranttary túgeldeı jataqhanamen qamtylǵan.
Almas NÚSIP,
«Egemen Qazaqstan»
ALMATY
