Memleket basshysy qatysýshylardy mereıtoımen quttyqtap, olımpıadalyq qozǵalystyń qazirgi álemdegi erekshe rólin atap ótti.
– Biz halyqaralyq olımpıadalyq qozǵalysqa qosyldyq. Ol táýelsiz jańa Qazaqstandy qurý isiniń mańyzdy bir bóligi bolyp sanalady. Sebebi, olımpıadalyq qozǵalys degenimiz sportpen ǵana shektelmeıdi ǵoı. Bul – ashyqtyq, birlik, ózara qurmet qundylyqtaryna, tán men jannyń jetilýine negizdelgen ómir fılosofııasy. Olımpıada modeli boıynsha ýnıversıadalar, qurlyq oıyndary men basqa da jarystar ótkizilip turady. Olımpıada jeńimpazdarynyń úlgisi búkil álemdegi mıllıondaǵan balany sportpen shuǵyldanýǵa jigerlendiredi, – dedi Qazaqstan Prezıdenti.
Sonymen qatar, Elbasy elimizde halyqaralyq sport sharalaryn daıyndaý jáne ótkizý tıisti deńgeıde júzege asyrylyp otyrǵanyn atap ótti.
– Qazaqstan álemdik olımpıada qaýymdastyǵynyń laıyqty múshesine aınaldy. Biz sporttyń damýyna jan-jaqty qoldaý kórsetip kelemiz. Keıingi 25 jylda týymyz barlyq olımpıadada jelbirep, sportshylarymyzdyń jeńisiniń qurmetine ánuranymyz asqaqtady. Taıaýda ulttyq quramamyz Almatyda ótken Qysqy ýnıversıadada óz deńgeıiniń bıik ekenin daýsyz dáleldedi, – dedi Nursultan Nazarbaev.
Memleket basshysy Qazaqstannyń álemdik sport arenasynda óz ornyn budan ári bekemdeı túsetinine senim bildirip, sportshylarymyzǵa jańa jetistikter men jeńister tiledi.
Sońynda Elbasy is-sharanyń qurmetti qonaǵy – Ulttyq olımpıada komıtetteri qaýymdastyǵynyń prezıdenti Ahmad ál-Fahad as-Sabahty sportty damytýǵa qosqan zor úlesi úshin Qazaqstan Respýblıkasy Táýelsizdiginiń 25 jyldyǵyna arnalǵan mereıtoılyq medalmen marapattady.
