Shymkent qalasyna jasaǵan eki kúndik jumys saparynda germanııalyq kásipkerler OQO kásipkerlik Palatasynda, «Ontustik» týrısttik-aqparattyq ortalyǵynda jáne «Tassaı», «Ońtústik» ındýstrıaldy aımaǵy men arnaıy ekonomıkalyq aımaqta ornalasqan kásiporyndarda bolyp, ondaǵy jumyspen tanysty, dep habarlaıdy OQO ákiminiń baspasóz qyzmeti.
Delegattar quramynda Orta Azııadaǵy Germanııanyń ekonomıkalyq ókildiginiń orynbasary G.Jýnýsalıeva, «Robert Bosch» JShS-niń dırektory V.Kolomysyn, «SEW-EURODRIVE» kompanııasynyń ókili men «Vırtgen Qazaqstan» kásiporynnyń bas dırektory A.Elgonov bar.
Qazaqstan men Germanııa arasynda saýda-ekonomıkalyq yntymaqtastyq qarym-qatynas joǵary. Germanııa Eýropalyq odaqta Qazaqstannyń basty seriktesi bolyp tabylady. Al, Ońtústik Qazaqstanda búginde germanııalyq kásipkerlerdiń qatysýymen ınvestısııa kólemi 52 mlrd. teńge bolatyn 3 joba júzege asyrylýda.
Eki eldiń ekonomıkasynyń ár túrli salasynda yntymaqtastyq ornatý men damytý máselelerin talqylaý maqsatynda óńirge kelgen mártebeli meımandarmen oblys ákimi J.Túımebaev kezdesti.
«Búginde memleket shetel ınvestorlaryna kóptegen múmkindikterdi qarastyryp otyr. Al aýyl sharýashylyǵy men shaǵyn kásipkerlik salasy jolǵa qoıylǵan Ońtústik Qazaqstan ınvestısııa salýǵa qolaıly óńir bolyp tabylady. Eki jaqtyń yntymaqtastyǵyn arttyrý, qazaq-nemis kásipkerleri tájirıbe almasyp, seriktes bolýǵa múmkindik týdyratyn bıznes-forým ótkizý qajet. Germanııanyń túrli salada tájirıbesi mol ekenin eskere otyryp, belsendi baılanys ornatýǵa nıettimiz»,- dedi J.Túımebaev.
Sonymen qatar, ákim Germanııanyń bas konsýlyna Túrkııa elindegideı nemistiń eki avtoshına shyǵaratyn zaýyty men «Mersedes» markaly aýyr júk kóligin (FÝRA) shyǵaratyn mashına qurastyratyn zaýytynyń fılıalyn Ońtústik óńirinde de ashýdy usyndy.
Bas konsýl óz kezeginde nemis kompanııalary Ońtústik Qazaqstan oblysyn damytýǵa arnalǵan ártúrli jobalarǵa qatysýǵa daıyn ekendigin aıtyp, eki el arasyndaǵy yntymaqtastyq berik, ári senimdi áriptes ekenin jetkizdi.
«Sapar barysynda nemis kásipkerlerin kóptep tartý úshin olarǵa qyzyqty bolyp tabylatyn óńirdiń ınvestısııalyq múmkindikterin tarazylaý maqsatynda ındýstrıaldy aımaqtardyń jumysymen tanystym. Ońtústik Qazaqstan oblysy men onyń ortalyǵy Shymkent qalasy Germanııa úshin Qazaqstannyń basqa oblystarymen salystyrǵanda mańyzdy óńir bolyp tabylady. Sebebi, kúngeı aımaq halqynyń tyǵyz qonystanǵandyǵymen ǵana emes, ekonomıkalyq jaǵynan óte damyǵan aımaqtardyń biri bolyp tabylady. Munan bólek, Qazaqstan men Germanııa osy jyly qos el arasyndaǵy dıplomatııalyq qatynastyń ornatylǵanyna 25 jyl tolýyn atap ótpek. Sondyqtan, Qazaqstan saýda-ekonomıkalyq jaǵynan Germanııanyń Orta Azııadaǵy senimdi strategııalyq seriktesi bolyp tabylatynyn aıta ótkim keledi» –dedi Iorn Rozenberg.
Taraptar barlyq qyzyǵýshylyq tanytatyn máseleler boıynsha turaqty aqparatpen almasý jáne aýyl sharýashylyǵy salasyndaǵy ekijaqty yntymaqtastyqty barynsha arttyrý týraly ýaǵdalasty.
