Jyl saıyn dástúrge aınalǵan saıystyń maqsaty – ustazdardyń densaýlyǵyn nyǵaıtý, sporttyq sheberligin shyńdaý jáne salaýatty ómir saltyn qalyptastyrý.
Sporttyń shaǵyn fýtbol, ústel tennısi, prezıdenttik kópsaıys, basketbol, doıby, voleıbol, shahmat, toǵyzqumalaq sekildi on túrinen ótken jarysqa 9 komanda qatysyp, baptary men baqtaryn synady.
«Barsha azamattardyń densaýlyǵyn nyǵaıtý – jarqyn bolashaqqa aparatyn altyn súrleý dese de bolady. Memleket basshysy Qazaqstan halqyna arnaǵan Joldaýynda dene shynyqtyrý men sportty damytýǵa aıryqsha kóńil bólý qajettigine basymdyq bergen bolatyn. Qazirgi tańda osy baǵytta aýqymdy memlekettik baǵdarlamalar qabyldanyp, júzege asyrylýda. Jalpy bilim beretin orta mektepte jan-jaqty, damyǵan, densaýlyǵy myqty, salaýatty ómir saltyn murat tutqan jeke tulǵalardy tárbıeleý basty talap etilip otyr. Búgingi jas urpaqtyń bilimdi de bilikti, sapaly azamat bolyp jetilýi tálim-tárbıe beretin ustazǵa, ata-anaǵa, ósken ortasyna tikeleı baılanysty. Sondyqtan da bolashaq pedagog mamandardy daıarlaıtyn ujymnyń aldynda turǵan basty máseleniń biri – salaýatty ómir saltyn nasıhattaý», – dedi ınstıtýttyń Tárbıe isi jáne áleýmettik máseleler jónindegi prorektory Orynqyz Joldasova.
Instıtýt basshylyǵy sport básekesinde «júzden – júırik, myńnan – tulpar» shyqqan komandalar men jekeleı qatysýshylarǵa Alǵys hattar jáne baǵaly syılyqtar tabystady.
