Elbasy óz Joldaýynda «Sybaılas jemqorlyqtyń sebepteri men alǵysharttaryn anyqtap, olardy joıý jumysyn kúsheıtý qajet», dep tapsyrdy. Al kemel keleshek pen baıandy bolashaq adal eńbektiń ǵana aıasynda saltanat qurady. Ultyn súıetin urpaq qalyptastyrý da uly mindet.
Sybaılas jemqorlyqtyń kez kelgen kórinisine tózbeýshilikti qalyptastyrý maqsatynda Jambyl oblysynda «Parasyz bolashaqqa. Birge!» uranymen mobıldi top quryldy. Taraz qalasyndaǵy Qazaqstan Respýblıkasynyń Tuńǵysh Prezıdenti saıabaǵynda ótken jıynda Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblys boıynsha departamentiniń basshysy Maqsut Nálibaev, «Nur Otan» partııasy oblystyq fılıaly tóraǵasynyń birinshi orynbasary Murathan Shúkeev, Memlekettik syılyqtyń laýreaty, mádenıet qaıratkeri Nursıfat Salyqova jáne basqa da azamattar sóz alyp, jemqorlyqtyń qoǵamdaǵy keleńsiz áreket ekenine toqtaldy. Sondaı-aq jastardy sybaılastyqpen kúreske shaqyrdy.
Al mobıldi toptyń negizgi maqsaty – oblys aýmaǵynda ornalasqan barlyq mekemelerdiń eńbek ujymdaryna aqparattyq-túsindirý jumystaryn júrgizý jáne memlekettik qyzmet kórsetý barysynda týyndaıtyn ákimshilik kedergilerdi barynsha azaıtý. Sonymen qatar, azamattardy jeke qabyldaýdy júzege asyrý da basty nazarda. Bastalǵan mobıldi top jumysy jyl sońyna deıin júrgiziledi.
Mobıldi top quramyna «Nur Otan» partııasy oblystyq fılıalynyń qyzmetkerleri, «Jańarý» sybaılas jemqorlyqqa qarsy jalpyulttyq qozǵalysy Respýblıkalyq qoǵamdyq birlestiginiń ókilderi, oblystyq kásipodaq uıymdarynyń jetekshileri, oblystyq qoǵamdyq keńes músheleri, Memlekettik qyzmet isteri jáne sybaılas jemqorlyqqa qarsy is-qımyl agenttigi men ulttyq bıýrosynyń Jambyl oblysy boıynsha departamentiniń basshylyǵy engizilgen. Mobıldi top quramyna engen barlyǵy 15 azamat endi oblystyń on aýdanynda jáne barlyq eldi mekenderinde bolyp, halyqpen kezdesý ótkizý úshin jolǵa shyqty.
Hamıt Esaman,
«Egemen Qazaqstan»
Jambyl oblysy
