Osydan on jeti jyl buryn qalalyq deńgeıde bastalǵan týrnır jyl sanap qanatyn keńge jaıyp, qazir aımaqtyq jarysqa aınaldy. Bıylǵy týrnırge Jezqazǵan, Sátbaev qalalary men Ulytaý aýdanynyń Borseńgir aýyly, Jezdi kenti jáne Keńgir aýylynan 50-den asa jas shahmatshy qatysty.
– Meniń ákem shahmatty óte jaqsy kóretin, qoly qalt etkende dos-jarandarymen shahmat oınaıtyn. Ákemizge qarap aǵam da, inim de, men de osy oıynǵa úıirsek bolyp óstik. Sondyqtan, osydan on jeti jyl buryn sol kezdegi qala basshylyǵy tarapynan meniń atyma oqýshylar arasynda shahmattan týrnır ótkizý týraly usynys túskende qýana qabyldaǵan bolatynmyn. Aımaqtaǵy jas shahmatshylardyń týrnırde baq synasyp jatqanyn kórý kóńildi odan ári ósire túsedi, – dedi jarystyń ashylý saltanatyna qatysqan Muhambet Kópeev.
Sátbaev qalasynyń ákimi Asqar Ydyrysov shahmattyń sporttyq tartys qana emes, «aqyl-oı gımnastıkasy» ekendigine de toqtaldy. Ol keıingi jyldary respýblıkamyzda jas shahmatshylardyń álemdik jarystarda aldyńǵy oryndardan tabylyp júrgendigin aıtty, jastardy solarǵa qarap boı túzeýge shaqyrdy.
Týrnır qorytyndysy boıynsha «Eń qysqa partııa» nomınasııasy boıynsha jezqazǵandyq Asylbek Omrakýnov, «Eń ádemi partııa» nomınasııasy boıynsha sátbaevtyq Qazybek Qulybek pen jezqazǵandyq Oljas Dosetov, Ulytaý aýdany, Borseńgir aýylynyń oqýshysy Zarına Qural «Jeńiske degen jigeri úshin», jezqazǵandyq Sálimjan Saqbaev «Eń jas qatysýshy» nomınasııasy boıynsha jeńimpaz atandy.
Sátbaevtyq Gúljamal Jalbyrova «Tańdaýly jattyqtyrýshy» atansa, «Ádil tóreligi úshin» nomınasııasynyń júldesi Vladımır Olegovıch Knıazıýkke buıyrdy. Jarys qorytyndysynda komandalyq esep boıynsha «Sátbaev qalasy-1» komandasy birinshi oryndy jeńip aldy.
Jarys jeńimpazdaryna gramotalar men baǵaly syılyqtar tapsyryldy.
Abdolla Dastanov,
jýrnalıst
Qaraǵandy oblysy,
Sátbaev qalasy
