Eýrazııa ulttyq ýnıversıtetiniń janynan qurylǵan mádenı-tanymdyq birlestik «Káýsar» klýbynyń uıymdastyrýymen aqyn, dramatýrg, Qazaqstan Jazýshylar odaǵy basqarmasynyń tóraǵasy Nurlan Orazalınmen shyǵarmashylyq júzdesý uıymdastyryldy. Saltanatty sharaǵa aqynnyń ustazdary, áriptesteri men shyǵarmashylyq salada iz tastap júrgen ini-qaryndastary, sondaı-aq, oqý ornynyń stýdent jastary qatysty.
Nurlan Orazalın ótken ǵasyrdyń 70-jyldary qazaq ádebıetine ózindik únimen kelip, qazaq lırıkasynyń kókjıegin keńeıtip, syrshyl sezimdi jyrlarymen oqyrmanyn baýrap kele jatqan aqyn.
Aqynnyń:
Bizder, qalqam, óleń atty
eldenbiz.
Jaýynnanbyz,
Qaıǵydanbyz,
Jeldenbiz.
Máńgiliktiń úrlep máńgi
maıdanyn
Ǵasyrlardyń qoınaýynan
engenbiz.
Keýdemizde – aptap, shilde, maı,
tamyz,
Jyrlarymyz ot búrkedi,
baıqańyz.
Qara qyldy qaq jaratyn qaı
kezde
Ádiletti baıraq eter taıpamyz, – dep aıtatyny da sondyqtan. Jyr qudiretin, asyl sózdiń salmaǵyn baǵamdaı biletin aqynnyń qashanda aıtary bólek emes pe. Osy bir jyr joldary aqyn Nurlan Orazalınniń ádebıet álemindegi ómirlik kredosy ispetti. «О́leń atty eldiń» ortasynda júrip otty jyrdy alaýlatyp, baıraǵyn asqaq ustap kele jatqan qalamgerdiń qaı kezde de eńsesi bıik. О́ıtkeni, keńistikke bıikten kóz tastaıtyn aqynnyń oılary da ozyq keledi. Ozyq oı jyrǵa aınalǵanda oqyrmanyna erekshe qýat-kúsh, rýh syılaıdy.
Nurlan Orazalınniń qalamynan ondaǵan kórkem dúnıeler týdy. Ár jyldarda «Beımaza kóńil», «Kóktem kóshi», «Jetinshi qurlyq», «Azamatqa amanat», «Quralaıdyń salqyny», «Ǵasyrmen qoshtasý», «Syrnaıly shaq», t.b. jyr jınaqtary men «Azamattyq aıdyny» atty kórkem pýblısıstıkalyq-esse tolǵaýlar kitabynyń avtory. Dramatýrg retinde «Shyraq janǵan tún», «Aqqus týraly ańyz» pesalary orys, ýkraın, moldavan, qyrǵyz, ózbek tilderine tárjimalandy.
Kezdesý barysynda, ýnıversıtet stýdentteri aqynnyń óleńderin jatqa oqyp, tyńdarmannyń qulaq kúıin jyrmen sýsyndatty. Jalyndaı laýlap jyr tókken jastarǵa qarap, aqynnyń da shabyty oıanyp, ár jyldary jazylǵan eldik, elshildik, rýhanı úndestik, baıandy mahabbat taqyryptaryn qaýzaıtyn tátti shýmaqtaryn shyrynyn tókpeı tyńdarmandaryna óz únimen jetkizdi.
Jıynnyń ishki tártibi boıynsha, qoıylǵan suraqtarǵa jaýap berý dástúrin de attap ketken joq. Basqasyn aıtpaǵanda. «Qazaqstan Jazýshylar odaǵynda músheler sany nege kóp?», «Senat depýtaty retinde nendeı is tyndyrdyńyz?» degen kópshilik suraǵynda aqyn aǵamyz: «Jazýshylar odaǵyna 800-ge tarta adam múshelikke ótken. Bul kóp emes. Turǵyndar sany bizden áldeqaıda az qyrǵyz elinde 1500-deı, О́zbekstan, Tájikstan, Ázerbaıjannyń árqaısysynda 2000-nan artyq resmı múshelikke ótken jazýshylary bar», – dese, kelesi suraqtyń jaýaby retinde ózi jáne ózge de áriptesteriniń qoldaýymen jaqyn kúnderi jazýshylarǵa tólenetin qalamaqy máselesi sheshiletinin, bul zańdy turǵyda maquldaný ústinde ekenin jáne oralman qandastarǵa jedel azamattyq bergizýge de bir kisideı at salysqanyn jetkizdi.
Kesh qonaqtary atynan jyly lebizin bildirýge shyqqan akademık-aqsaqal Serik Qırabaev shákirti hám izin basqan inisi Nurlan Myrqasymuly jaıly: «Bul zamanymen úndesken aqyn, qıyndyqqa, orynsyz synǵa kúırep ketpeıtin qajyrly qaıratker» degen baǵa berdi.
Sońynda sharany uıymdastyrýshylar Nurlan Orazalındi ǵylymı keńestiń atynan «Kúltegin» tósbelgisimen marapattady.
Beken Qaıratuly,
«Egemen Qazaqstan»
Sýretterdi túsirgen
Erlan OMAROV,
«Egemen Qazaqstan»
