Oqý-aǵartý mınıstrliginiń habarlaýynsha, N.Bekbosynov atyndaǵy Mańǵystaý energetıkalyq kolledjiniń arnaıy pán oqytýshylary Dosan Qarashaev pen Aınur Ondahanova halyqaralyq deńgeıdegi bedeldi «ETF Green Skills Awards 2025» jobasynan jeńispen oraldy.
Pedagogter konkýrsqa «Zamanaýı bilim berý baǵdarlamalarynyń jasyl tehnologııalardy damytýdaǵy roli» taqyrybyndaǵy avtorlyq jobalaryn usynyp, jańartylatyn energııa kózderin oqý úderisine tıimdi engizý, sondaı-aq bolashaq mamandardyń ekologııalyq quzyrettiligin arttyrý baǵytyndaǵy ózekti máselelerdi jan-jaqty negizdedi.
Halyqaralyq jobaǵa álemniń 50-den astam elinen 250-den asa úmitker qatysyp, irikteý birneshe kezeń boıynsha júrgizildi. Barlyq kezeńderden sátti ótken mańǵystaýlyq pedagogter óz jobalaryn halyqaralyq sarapshylar aldynda joǵary kásibı deńgeıde qorǵap, nátıjesinde eń úzdik bes jobanyń qataryna endi.
Jeńimpazdardy marapattaý rásimi Italııanyń Týrın qalasynda ótti. Saltanatty shara Týrın polıtehnıkalyq ýnıversıtetinde uıymdastyrylǵan «EO – Italııa energetıka kúnderi: energetıkalyq aýysýdy qamtamasyz etý jáne nyǵaıtý boıynsha jańa is-qımyldar» atty halyqaralyq konferensııa aıasynda ótkizildi. Bıylǵy rásim «Green Skills» syılyǵynyń bes jyldyq mereıtoıyna arnaldy.
