Sport-shejireni aqtaryp otyryp, myna bir qyzyqqa kýá bolǵanym bar. Táýelsizdik alǵan 25 jyldyń ishinde Qazaqstan alty jazǵy, alty qysqy Olımpııa oıyndaryna qatysty. Dopıng daýyna iligip, tórt jyldyqtyń basty dodasynan enshilegen bes altynymyzdan aıyrylyp qaldyq. Degenmen bizde qazir Táýelsizdik jyldary topjarǵan 16 Olımpıada chempıony bar eken. Sonyń ishinde úsh chempıon bir kúnde dúnıege kelgen. Mundaı qyzyq bolady. Barlyǵynan basynan tarqatyp aıtsaq.
1996 jyly Qazaqstan eń alǵash ret qatysqan jazǵy Olımpııa oıyndarynda boksshy Vasılıı Jırovke 81 kıloda teń keler eshkim bolmady. «Balqashtyń jolbarysy» sol jyly úzdik boksshyǵa beriletin Vel Barker kýbogyn da enshiledi. Jırov 1974 jyly 4 sáýirde dúnıege kelgen.
Arada 4 jyl ótkende Jırovtan keıin bokstan ekinshi altyndy túrkistandyq jas qyran Bekzat Sattarhanov syılady. Marqum Bekzat ta 4 sáýir (1980 jylǵy) kúni dúnıe esigin ashqan eken.
Al byltyr Brazılııa jerinde eshkim kútpegen jerden sýda júzýden 200 metr qashyqtyqta chempıon atanǵan Dmıtrıı Balandın de Vasılıı men Bekzat sekildi sáýir aıynyń tórtinshi juldyzynda ómirge kelipti.
Bir kúnde úsh chempıonnyń ómirge kelýi sırek qubylys dep baǵalaýǵa bolady.
Jalpy, naýryz ben sáýir aılarynda qazaqtyń birneshe talantty boksshylary óz týǵan kúnderin atap ótedi. Mysaly, Vasılıı men marqum Bekzattan bólek, álem chempıony Jánibek Álimhanuly men kásipqoı bokstaǵy juldyzymyz Gennadıı Golovkın de osy aıdyń týmalary. Jánibek 1 sáýirde, Gennadıı 8 sáýir kúni dúnıege kelgen.
Al 69 kıloda qazaqtyń ánuranyn qalyqtatyp, kók týyn jelbiretken tórt chempıonymyz bolsa, onyń ekeýi naýryzda, ekeýi qarashada dúnıege kelgen. Baqtııar Artaev (14 naýryz) pen Danııar Eleýsinov (13 naýryz) naýryzda týǵan bolsa, Serik Sápıev (16 qarasha) pen Baqyt Sársekbaev (29 qarasha) qarashada shyr etip ómirge kelipti.
Bek TО́LEÝOV,
jýrnalıst
ASTANA
