Sharada elshiler men kásipkerlerge Elbasy tapsyrmasyna sáıkes jasalǵan Agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasynyń negizgi maqsaty men mindetteri tanystyryldy.
Syrtqy ister mınıstri Q.Ábdirahmanov óz sózinde AО́K-ti damytýdaǵy eksporttyq jáne ınvestısııalyq maqsattarda eki vedomstvonyń qyzmetterin qosý jáne baǵyttaý úshin AShM men SIM arasyndaǵy qol qoıylǵan birlesken is-sharalar jospary týraly aıtyp ótti. Sonymen qatar, mınıstr jańa jahandyq damý kezeńinde Qazaqstanda agroónerkásiptik sektordyń qarqyndy damýyna erekshe nazar aýdarylyp otyrǵanyn jetkizdi.
О́z kezeginde Premer-Mınıstrdiń orynbasary – Aýyl sharýashylyǵy mınıstri Asqar Myrzahmetov dıplomattar men halyqaralyq bıznes qaýymdastyǵy ókilderine jańa memlekettik baǵdarlamany iske asyrýǵa belsendi qatysýǵa shaqyryp, Qazaqstannyń Eýrazııany astyqpen qamtamasyz etýge jáne ekologııalyq taza tamaq óndiretin iri óndirýshilerdiń biri bolýǵa barlyq múmkindigi bar ekendigin atap ótti.
Jıynda ınvestısııalyq klımatty jaqsartý maqsatynda Aýyl sharýashylyǵy mınıstrligi tarapynan transulttyq kompanııalardyń qatysýymen Qazaqstannyń eksporttyq taýarlaryn álemdik naryqqa shyǵarýǵa baǵyttalǵan jumystary júrgizilip jatqany da keńinen sóz boldy.
Búginde Transulttyq kompanııalardyń qatysýymen 4 joba tańdap alyndy. Bul jobalar et, sút ónimderin óndirý, óńdeý ónerkásibi jáne ósimdik sharýashylyǵy (qyzanaq pastasyn óndirý) salalaryna tıesili. Transulttyq kompanııalardan basqa, AО́K salasynda sheteldik ınvestorlardyń qatysýymen taǵy 40-qa jýyq jobalar bar. Investorlardyń basym bóligi Reseı, Germanııa, Túrkııa, Ýkraına, Ońtústik Koreıa, QHR jáne Fransııa memleketterinen.
2017-2021 jyldarǵa arnalǵan Agroónerkásiptik keshendi damytý baǵdarlamasy boıynsha otandyq taýardyń eksporttyq áleýetin arttyrý jáne ishki naryqty toltyrý kózdelgen. Naqtyraq aıtar bolsaq, 2021 jylǵa qaraı eksport kólemi 0,8-den 1,5 mlrd dollarǵa kóbeımek.
Asqar Myrzahmetov Qazaqstanǵa shet memlekettermen iskerlik qatynasty damytý jáne nyǵaıtý múmkindigin beretin strategııalyq qujattardyń mańyzdylyǵyn aıta kelip, elshiler qoıǵan saýaldarǵa keńinen jaýap berdi.
Aıta keteıik, joǵaryda atalǵan baǵdarlama boıynsha, azyq-túlik taýarlarynyń eksportyn 2021 jylǵa deıin 40 paıyzǵa arttyrý úshin ár jylǵa arnalǵan naqty kórsetkishter mindettelgen.
Baýyrjan MUQANOV,
«Egemen Qazaqstan»
