Oblystyq aýyl sharýashylyǵy basqarmasynyń bergen málimetterine súıensek, bıyl óńirdegi egis alqaptarynyń kólemi 1321,5, onyń ishinde dándi jáne dándi – burshaq daqyldary 605, malazyqtyq daqyldar 298,6, kartop 21,3, kókónis daqyldary 12,3 myń gektardy quraıdy dep josparlanyp otyr. Tuqym qory da jetkilikti. Oblys boıynsha dándi daqyldar tuqymyna – 95,2, maıly daqyldarǵa – 4,3, bir jyldyq jáne kóp jyldyq shópterge − 1, kartopqa 59,8 myń tonna suranys túsipti. Dándi jáne dándi burshaq daqyldary tuqymynyń 68,5 myń tonnasy tekserýge jiberilip, onyń 64 myń tonnasynyń sapasy tekserýden ótip, tekserilgen tuqymnyń 63,9 myń tonnasy kondısııaly bolyp shyǵypty.
– Kóktemgi egis jumystaryna qajetti jer óńdeý jáne egistik tehnıkalary jetkilikti. Traktorlardyń daıyndyǵy – 92, jer óńdeý tehnıkalarynyń daıyndyǵy – 95, egistik tehnıkalarynyń daıyndyǵy 96 paıyzdy quraıdy. Oblystaǵy kóktemgi egis jumystaryn júrgizýge 26,0 myń tonna dızel otyny qajet. Búgingi kúni aımaqtyń aýylsharýashylyq qurylymdarynda 9,9 myń tonna janar-jaǵarmaı bar. Qazirgi ýaqytta Energetıka mınıstrligi Pavlodar munaı – hımııa zaýytynan 1 tonnasy 127 myń teńgeden 25,0 myń tonna dızel otynyn bóldi, onyń ishinde naýryz, sáýir aılaryna 8 myń jáne mamyr aıyna 9 myń tonna dızel otyny bólindi, – deıdi oblystyq aýyl sharýashylyǵy basqarmasynyń basshysy Qonysbaı Tóleýbekov.
Basqarma basshysy óńirdegi ósimdik sharýashylyǵyn qoldaý maqsatynda bıyl oblystyq bıýdjetten 3 mlrd 160,2 mln teńge sýbsıdııa bólinip otyrǵanyn, oblystyń aýylsharýashylyq taýaryn óndirýshiler men mıneraldy tyńaıtqyshtardy óndirýshi otandyq zaýyttar arasynda 34 myń tonna tyńaıtqyshqa 1,67 mlrd teńge sýbsıdııa bólý jóninde shart jasalǵanyn aıtty. Sonymen qatar, «Agrarlyq nesıe korporasııasy» AQ arqyly kóktemgi egis jáne jıyn-terim jumystaryn ekinshi deńgeıli bank kepildigimen 3 paıyz jyldyq mólsherlememen tikeleı qarjylandyrý jáne kredıttik seriktestikterdi 4 paıyz jyldyq mólsherlememen qarjylandyrý boıynsha da tıisti jumystardyń bastalǵanyn jetkizdi.
Sharýalar ne deıdi? Kóktemgi egiske ázir me? Ulan aýdany Tavrııa aýylyndaǵy bıdaı jáne kúnbaǵys ósirýmen shuǵyldanatyn, 5 myń gektar alqaby bar «Izýmrýd» JShS-niń ókili Evgenıı Zenok byltyr óńirge qystyń erte túsýi saldarynan ala jazdaı bel jazbaı ósirgen kúnbaǵysynyń birshama bóliginiń qar astynda qalǵanyn aıtady.
– Bıyl byltyrǵydaı emes, qar qalyń. Sondyqtan jer ylǵaldy bolatyn shyǵar degen úmitimiz bar. Kóktemgi dala jumystaryna tehnıkalarymyz 100 paıyz daıyn deýge bolady. Tek aýa-raıynyń qabaǵyna qarap otyrmyz. Kún jylynsa, jer degdise jumysqa kirisýge daıynbyz, − degen ol janar jaǵarmaıdyń jetkilikti ekendigin, egis jumystaryna jańa tehnologııalardy qoldanyp jatqandyqtaryn tilge tıek etti.
Oblystyń shalǵaıyndaǵy Úrjar, Tarbaǵataı aýdandarynyń dıqandary da soqa-saımandaryn daıarlap, jer aıaǵynyń keńigenin kútip otyr. Úrjar aýdandyq kásipkerlik jáne aýyl sharýashylyǵy bóliminiń basshysy Táýirjan Shomanov kóktemgi egiske aýdan boıynsha 7139 tonna jazdyq dándi daqyldar tuqymy daıyndalyp, onyń 7308 tonnasy «Qazagreks» AQ zerthanasynda tekserilýden ótkizilgenin, munyń 6687 tonnasy ekinshi, 621 tonnasy úshinshi klasqa jatqyzylǵanyn aıtty.
– Egistik jerlerdiń qunaryn arttyrýǵa erekshe kóńil bólip otyrmyz. Bıyl 26 aýylsharýashylyq qurylymy 4880 tonna mıneraldy tyńaıtqyshtar satyp alýǵa ótinim berdi. Qazir aýdandaǵy sharýa qojalyqtarynyń ıeliginde 2216 dana aýylsharýashylyq traktorlary bar. Onyń 1824 danasy dońǵalaqty, 258-i shynjyr tabandy tehnıkalar. Sharýashylyqtardyń mashına-traktor parkin jańalaý kún tártibinen túsken emes. Kóktemgi dala jumystaryn júrgizýge aýyldyq okrýgterden 4540 tonna dızel otynyna tapsyrystar berildi. Oblystyq aýyl sharýashylyǵy basqarmasynan aýdanǵa 3060 tonna jeńildetilgen dızel otyny bólindi, – deıdi Táýirjan Shomanov.
Tarbaǵataı aýdanynyń sharýa qojalyqtary bıyl 791 gektar jerge bıdaı, 768 gektarǵa arpa, 360 gektarǵa kókónis, 430 gektarǵa qytaı burshaǵyn, 160 gektarǵa júgeri, 1000 gektarǵa kópjyldyq shóp egýdi josparlap otyr. Aǵymdaǵy egis naýqanyna 4800 tonna janar-jaǵarmaı, 68 tonna tyńaıtqysh ázirlengen. 106 «Belarýs», 30 «DT» traktory, 40 tuqym sepkish tehnıka saqadaı saı.
Azamat QASYM,
«Egemen Qazaqstan»
Shyǵys Qazaqstan oblysy
