Dúnıe júzi sıfrlyq tehnologııaǵa kóship jatqanda, kitap jármeńkesin ótkizip, eldi dástúrli oqý júıesine shaqyrý aǵysqa qarsy júzgenmen birdeı bolýy múmkin. Alaıda, bul shara baspa salasynyń mamandary da izdenip, kóshten qalmaı kele jatqanyna kóz jetkizdi. Tek mátininiń mazmundylyǵymen ǵana emes, syrtqy bezendirilýimen, zamanaýı tehnıka men tehnologııany, túrli materıaldardy baspa ónimderine ornymen qoldana bilgenniń arqasynda kitap ataýly uzatylar qyzdaı bolyp, erekshe tartymdy dúnıege aınala túskenin de ańǵarý qıyn emes edi.
Qatary kemise de, talǵamy óse túsken oqyrman kórme aıasynda óz qajettiligine oraı túrli baspa ónimderin satyp alyp jatty. Munyń ózi kitaptyń qundylyqtar qatarynan túspeıtinin dáleldeı túskendeı edi.
Jalpy, kórmeni uıymdastyrýdaǵy negizgi maqsat aqparatty tehnologııa sharyqtap damyp jatqan zamanda tutynýshyǵa elimizdiń baspa isindegi jetistikterin, jaryq kórip jatqan kitaptardy keńinen taratýǵa yqpal etý, otandyq kitap baspasy salasyn nyǵaıtyp, baspa jumysynyń sýbektileri arasynda tájirıbe almasýǵa jaǵdaı jasaý bolǵan. Kózdelgen maqsatqa oraı, jınalǵan qaýym shara barysynda elimizdiń ǵana emes, Reseı, Belarýs, Qyrǵyzstan, Úndistan, Túrkııa elderiniń baspa salasyndaǵy jetistikterin tamashalap, óz talǵamyna saı kitaptarǵa qol jetkizdi.
Budan bólek, kórme aıasynda «Ulttyń sapaly adam kapıtalyn qalyptastyrýdaǵy kitaphanalardyń róli» atty konferensııa, Grýzııa, Ýkraına, Qazaqstannyń áıgili grossmeısterleri qatysqan «Hodja Nasreddın» atty I halyqaralyq shahmat týrnıri jáne jazýshy, kınodramatýrg Smaǵul Elýbaımen, saıasattanýshy, «Ult taǵdyry» qoǵamdyq qozǵalysynyń jetekshisi Dos Kóshimmen, «Qazaqstannyń rýhanı murasy» ulttyq komıtetiniń tóraıymy Hanzada Ázimhanovamen kezdesýler uıymdastyryldy. Sonymen qatar, aqyn A.Ahmetbekulynyń «Kók týdyń jelbiregeni», M.Sársekeniń Qanysh Sátbaev týraly kitabynyń, L.Babkovanyń «Mýzyka qupııalary», taǵy basqa kitaptardyń tusaýkeseri bolyp ótti.
Názıra SAILAÝQYZY
ALMATY
