Basqosýda sóz sóılegen Asqar Mamın qos el basshylarynyń bastamasymen Qazaqstan-Qytaı memleketteriniń birlesken ındýstrııalyq-ınnovasııalyq yntymaqtastyq baǵdarlamasy qabyldanǵanyn eske saldy. «Qujat aıasynda jalpy quny 27 mıllıard AQSh dollaryn quraıtyn 51 joba qolǵa alynyp otyr. Qytaılyq kompanııalar birlesken jobalarǵa belsendi atsalysýda. Byltyr Qazaqstan Prezıdentiniń QHR-ǵa resmı sapary barysynda «Nurly jol» jańa ekonomıkalyq saıasaty men «Jibek jolynyń ekonomıkalyq beldeýi» baǵdarlamasyn úndestirý josparyna qol qoıylǵan bolatyn. Jospar úlken kóliktik-tranzıttik, ınvestısııalyq damýdyń joldaryn ashty. Biz qazir sol jumystyń nátıjelerin kóre bastadyq», dedi vıse-premer. Onyń aıtýynsha, 2017 jyldyń eki aıynda Qazaqstan-Qytaı arasyndaǵy taýar aınalymy 30 paıyzǵa artqan. Bul – óte úlken kórsetkish.
Asqar Uzaqbaıuly Qytaı – Qazaqstan – Eýropa baǵytyndaǵy konteınerlik tasymal jyl saıyn eki esege ósip kele jatqanyn da tilge tıek etti. «Jyl basyndaǵy eki aıdy byltyrǵy sáıkes merzimmen salystyrǵanda, ósim 2,6 ese bolǵan. Bul «Bir beldeý – bir jol» jáne «Nurly jol» baǵdarlamalarynyń is júzinde júzege asyp jatqandyǵyn bildiredi», dedi ol.
Otyrys barysynda QHR Memlekettik keńesi Premeriniń birinshi orynbasary Chjan Gaolı Qytaı Tóraǵasy Sı Szınpınniń Astanada ótetin EKSPO-2017 kórmesine keletinin málimdedi. «Taıaýdaǵy eki aıdyń ishinde bizdiń memleket basshylarymyzdyń kezdesýi ótedi dep kózdelgen. Sizderdiń Prezıdentterińiz mamyr aıynyń ortasyna qaraı Qytaıǵa kelip, «Bir beldeý – bir jol» atty halyqaralyq forýmnyń jumysyna qatysady. Tóraǵa Sı Szınpın maýsym aıynyń basynda Astanaǵa saparlap, ShYU sammıtine jáne EKSPO-ǵa qatysady. Sondyqtan, olardyń arasynda óte mańyzdy kezdesýler ótedi», dedi Ch.Gaolı.
Taraptar otyrys barysynda ekijaqty yntymaqtastyq máseleleriniń keń aýqymyn, atap aıtqanda, saýda-ekonomıkalyq, energetıkalyq, ındýstrııalyq, ınnovasııalyq, mádenı-gýmanıtarlyq salalardaǵy ózara is-qımyl, shekara mańy jáne óńirlik seriktestikti damytý, kólik-logıstıkalyq, aýyl sharýashylyǵy, ǵylymı-tehnıkalyq salalardaǵy yntymaqtastyq máselelerin talqylady. «Nurly jol», «Jibek jolynyń ekonomıkalyq beldeýi» sekildi iri kólemdi baǵdarlamalardy iske asyrýdyń birlesken jumysy, sondaı-aq, kólik jáne logıstıka salasynda jańa ónimder men qyzmet túrlerin qurý jaıttary pysyqtaldy.
Jıynda «Qostanaı-Astana» telekópiri arqyly «Saryarqa Avto Prom» JShS-niń óndiristik alańynda «ANKAI» atty avtobýstar shyǵaratyn birlesken zaýyt iske qosyldy. Shara sońynda Yntymaqtastyq jónindegi Qazaqstan-Qytaı komıteti 8-otyrysynyń hattamasyna qol qoıyldy.
Ashat RAIQUL,
«Egemen Qazaqstan»
