Aqyn týǵan jerdiń talantty jastary ótken jyly «Farıza juldyzdary» atty ádebı klýb qurǵan edi. Olar aımaqtaǵy oqý oryndarynda, mádenıet mekemelerinde kezdesýler men túrli sharalar ótkizýdi dástúrge aınaldyrdy. Oblys ákimdiginiń qoldaýymen endi aýdandar men aýyldardy aralap, ónerlerin ortaǵa salady.
Poezııa patshaıymynyń qurmetine arnalǵan kabınettiń ashylý saltanatynda oblystyq mádenıet, muraǵattar jáne qujattama basqarmasynyń basshysy Ábil Jolaman, fılologııa ǵylymdarynyń doktory, professor Qadir Júsip, aqyn, halyqaralyq «Alash» syılyǵynyń ıegeri Qasymhan Begmanov, QR eńbek sińirgen qaıratkeri, jazýshy-dramatýrg Rahymjan Otarbaev, aýylsharýashylyǵy ǵylymdarynyń doktory Baqtybek Taýbaev, qoǵam qaıratkeri, «Qurmet» ordeniniń ıegeri Rashıla Múrsálıeva, Atyraýdaǵy Nazarbaev zııatkerlik mektebiniń dırektory Aıdarbek Aıtpókeshevter sóz alyp, ıgilikti iske qutty bolsyn aıtty.
Kitaphananyń keń de jaryq bólmesin Farıza Ońǵarsynova kabıneti qylyp jasaqtaýǵa belgili munaıshy Ermek Marabaev pen aqynnyń uly Aıvar Ońǵarsynov demeýshilik kórsetken.
«Bul oryn talantty jastar bas qosatyn, ońashada oılanatyn óner men óleńniń uıasy bolady degen nıettemiz. Atyraýǵa alys-jaqynnan kelgen ádebıet pen óner qaıratkerleriniń aldymen at basyn buratyn qasıetti mekenine, quthanasyna aınaldyrý – maqsatymyz», – deıdi «Farıza juldyzdary» klýbynyń jetekshisi, aqyn Álııa Dáýletbaeva.
Baqytgúl BABASh,
«Egemen Qazaqstan»
ATYRAÝ
