Ardagerlerdiń alǵashqy birinshiligi

Básekeli báıge shymyldyǵyn Ortalyq keńes tóraǵasynyń orynbasary, general Bekbolat Muqyshev quttyqtaý sózben ashty.

Budan 30 jyl buryn, ıaǵnı 1987 jyly sáýir aıynda Qazaq­stan Respýblıkasynyń Arda­gerler uıymy qurylǵan bolatyn. Osy ýaqyt aralyǵynda Arda­gerler uıymy halyqpen birge, Elbasymen birge talaı «tar jol taıǵaq keshýler» men kóptegen merekeli-mereıli jar­qyn kúnderdi artqa tastady. Saltanatty mereıtoıymyzdy respýblıkalyq deńgeıde shırek ǵasyrdan astam ýaqyt ishinde Ardagerler uıymynyń atqarǵan eńbegin qorytyndylap, el aldynda jáne ózimizge esep berip, erteńgi kúnderge josparlar qurý maqsatynda atap ótip jatyrmyz. Mereke qarsańynda respýblıka kóleminde ár oblys, ár aýdan ortalyqtarynda doıbydan, shahmattan, toǵyzqumalaqtan, bılıardtan sporttyq-mádenı saıystar ótkizip, qorytyndysy retinde Astanada bılıardtan res­pýblıkalyq birinshilik ót­kizýdi biraýyzdan qup­tap, sheshim qabyldaǵan bolatynbyz», dedi ol.

Oıyn barysynda, biz tartysty básekeniń shashbaýyn kóte­rip, janashyr bolyp júrgen biraz kórermendi sózge tartqan edik.

Saıystyń uıymdastyrýshysy QR IIM Qurmetti ardageri, Res­pýb­lıkalyq ardagerler uıymy Ortalyq keńesiniń jaýapty hatshysy Kópbolsyn Bekmaǵanbetov bylaı dedi:

– Bul saıys aqsaqal­dary­myzdyń salamatty ómir súrý­degi tájirıbesin jastarǵa úlgi-ónege retinde nasıhattaý men qarttardy sportqa tartý maq­satynda uıymdastyrylyp otyr. Jarysqa Mańǵystaý, Qy­zylorda, Batys Qazaqstan oblys­tarynan kelýge tıisti jeńimpaz sportshy-ardagerler kele almady. Ortalyq keńes atynan tarıhshy, jazýshy Qoıshyǵara Salǵara qosylyp, 14 bılıardshy dodaǵa tústi.

Jeti jup báıgege túsken jarys nátıje­sinde Aqmola obly­synyń bılıard sheberi Marat Dosqojın (73 jasta) I dárejeli dıplom­nyń jáne qomaqty júlde – túrli-tústi teledıdardyń ıegeri atandy. Sondaı-aq, M. Dosqojın bir kezdesýde eń kóp shar soqqanǵa belgilengen júlde – ýkraın sheberleriniń qolynan shyqqan, quny 70 myń teńgelik bılıard kıin jeńip aldy. Ekinshi oryndy astanalyq Boranbaı Jarylqaǵanov (70 jas­ta) jeńip alsa, qola júldeni Oń­tústik Qa­zaq­stannan kelgen Abdýgaı Bekjanov pen Shy­ǵys Qazaq­stan oblysynyń Jarma aýda­ny­nan kelgen Tóleýbek Qasenov (70 jas) ıelendi.

Astanadaǵy Uly Otan soǵysy múgedek­terine arnalǵan ortalyq klınıkalyq gospı­tal­dyń dırektory Ádilhan Abdýlın mekeme atynan taǵaıyndaǵan ar­naıy júlde – «Kórermen kóz­aıymy» syılyǵy almatylyq Toq­tar Esimovke (70 jasta) buıyrdy. Arnaıy júlde ıe­ger­­leri qatarynda joldy kók­temgi qar sýy shaıyp, apatty jaǵ­daı oryn alyp jatqanyna qaramaı Qaraǵandydan jetken Ońǵar Aıapbergenov, al­matylyq Qabıbolla Seıitov jáne qostanaılyq Anatolıı Kýdrıavsev (72 jas) syndy aq­saqaldar tanyldy. О́negeli ónerimen kózge tús­ken jam­byldyq ardager Baǵ­dat Daýylbaev, parasattylyǵy jáne máde­nıet­tiligimen kózge túsken pav­lodarlyq Ersaıyn Shuǵabaev jáne aqtóbelik Vıktor Gorbenko jastarǵa bar jaǵynan da úlgi-ónege bolarlyq aqsaqaldar re­tinde marapattaldy.

Saltanatty rásim barysynda saıystyń joǵary deńgeıde ótýine janashyrlyq tanyt­qan S.Muqanov, O.Aıapbergenov, Q.Seıi­tov jáne ShQO Jarma aýdandyq keńe­siniń tór­aǵasy Nurlybek Esbolov syndy aq­saqaldar Ortalyq keńes basshylaryna, uıym­dastyrý jumys­taryna bas bolyp júrgen Kóp­bolsyn Bekmaǵanbetovke bir­aýyzdan rızashylyqtaryn bil­dirip, alǵys aıtty.

Tilekgúl ESDÁÝLET

ASTANA