«Úsh aı boıy Taılandta jıynda boldym. Phuket Top Team komandasymen birge jattyqtym. Negizi qys saıyn Phýkette bolamyn. Biraq bul joly burynǵysynan da jaqsyraq daıyndaldym. Tájirıbeli sportshylar, Eýropanyń, Azııanyń túrli uıymdarynyń chempıondary kómektesti. Qazir bárine daıynmyn», – dedi Qýat Hamıtov.
Fight Nights-ke bergen suhbatynda «Naıman» Saıgıd Alıbekovti jeńgen sportshylarmen daıyndalyp jatqanyn aıtqan bolatyn.
«MMA-den áýesqoı jarystarda Alıbekovti jeńgen sportshylar kómektesti. Sonymen qatar, jeltoqsan aıynda onyń chempıondyq jekpe-jegin zalda otyryp kórgen bapkerler boldy. Olar da aqyl-keńesterin aıtty. Árıne, osal tustaryn ǵana emes, Alıbekovtiń myqty palýan ekenin, parterde jaqsy jumys isteıtinin, fızıkalyq turǵydan kúshti ekenin de jasyryp qalmady. Qandaı jaǵdaı bolmasyn erteń jekpe-jek kezinde kimniń kúshti ekeni belgili bolady.
Jalpy alǵanda Fight Nights týrnırinde osal sportshy joq. Magomedsaıgıd – promoýshenniń chempıony. Demek, ony elemeı ótýge bolmaıdy. О́z basym uıymda árbir tıtýldy aıqastyń tartysty óterine senimdimin», – dedi Hamıtov.
«Ahmed Alıvetiń jaraqatyna baılanysty Qýat Fight Nights týrnıriniń tıtýldy jekpe-jegine ońaı jetti, onyń joly bolǵysh», dep Magomedsaıgıd Alıbekov pen bapkeri aıtqan bolatyn. Osyǵan qatysty qazaqstandyq sportshy pikir bildirdi.
«Jolym bolyp ketti dep aıtpas edim. Fight Nights-pen kelisimshart jasasqanda bir-eki aıqastan keıin tıtýldy kezdesýge múmkindik beretinin bildim. Men solaı qaladym... Gadjı Rabadanovty jeńgennen keıin menen kelesi qarsylasym týraly surady. Qytaıdyń WBK uıymynyń chempıony bolǵannan keıin oktagonda Fight Nights Global-dyń chempıonymen kúsh synassam degen oı keldi. Kimniń kúshi basym ekenin endi bilemiz.
Bul tıtýldy Qazaqstanda kútip otyr. Osyny jeńsem, óz elimde Fight Nights belbeýin jeńgen alǵashqy adam bolamyn. Jurt menen jeńis kútip otyr. О́zim úshin emes bul belbeýdi halqym úshin jeńip alǵym keledi», – dedi qazaqstandyq sportshy.
Fight Nights prezıdenti Kamıl Gadjıevtiń aıtýynsha Almatyda dál osy týrnır ótedi.
«Alǵashynda jekpe-jegim Almatyda ótedi dep oılaǵan edim. Biraq Vladıvostokta jeńiske jeter bolsam, óz elimde ony qorǵaı alamyn», – dedi «Naıman».
Qýat Hamıtov qaı kezde sporttan ketýi múmkin? Aıtýynsha, aralas jekpe-jek bolǵannan keıin sportshy qaı kezdesýi sońǵy bolaryn bilmeıdi.
«Bilesiz be, alǵashqy chempıondyq belbeýimdi jeńip alǵannan keıin osymen toqtaımyn dep oılaǵan edim. Biraq bir-eki aptadan keıin jeńiske degen qushtarlyǵym qaıta oıandy. Ekinshi belbeýimdi alǵannan keıin de dál osyndaı kúıge tap boldym. Bul kúı úshinshi belbeýimdi jeńgennen keıin de boldy. Keıde otyryp, jetistikterime rıza bolamyn da aldyma jańa maqsat qoıamyn. Qaı jekpe-jegim sońǵysy bolaryn bilmeımin. Biz eń qaýipti sportta júrmiz. Sondyqtan múmkindiktiń bárin paıdalanyp qalýymyz kerek. Bul joly da múlt ketpeımin dep úmittenemin», – dedi Qýat Hamıtov.
Qazaqstandyq sportshy UFC uıymymen elisimshartqa ne sebepti qol qoımaǵanyn málimdedi.
«Ol kezde menedjerim UFC-diń aýyr salmaqtaǵy ýaqytsha chempıony Sheın Karvın bolatyn. Men Qytaıdyń reıtınginde kósh bastap turǵan edim. Usynys sol arqyly tústi. Shart boıynsha Aspanasty elinde taǵy bir aıqasta jeńgennen keıin ǵana UFC-men kelisimshartqa qol qoıýym kerek edi. Biraq kezekti jekpe-jegime daıyndalyp jatqanda kompanııa satylyp ketti. Jańa basshylar kelgennen keıin bul jospar júzege asa qoımady. Biraq qazir Fight Nights-ta júrgenime qýanamyn. Munda men ózimdi úlken otbasynyń bir múshesi sekildi sezinemin», – dedi
Magomedsaıgıd Alıbekov – áskerı qoıan-qoltyq urystan sport sheberi ataǵyna kandıdat, MMA boıynsha sport sheberi, áskerı qoıan-qoltyq urys boıynsha RF Qarýly kúshteriniń eki dúrkin chempıony, áskerı qoıan-qoltyq urystan TMD chempıony, MMA-dan Alysshyǵys federaldy okrýgi chempıonatynyń jeńimpazy, grepplıngten Reseıdiń kúmis júldegeri. Magomedsaıgıd Qýattan eki jas kishi, ol – 27 jasta. Alıbekov búginge deıin 7 kezdesý ótkizip, barlyǵynda jeńiske jetken. Al Hamıtov 25 jekpe-jektiń 20 kezdesýinde jeńiske jetse, tórteýinde ese jiberip, bireýinde teń tústi.
Aıta keteıik, qos sportshynyń arasyndaǵy aıqasty «Boes» telearnasy 15:00-de (Astana ýaqyty boıynsha) kórsetedi.
