«El ishi – óner kenishi» dep halqymyz aıtqandaı, búgingi el ishinde de erekshe talantymen talaıdy tamsandyryp júrgender barshylyq. Týǵan jer tósindegi talanttardy elge tanytý, halyqqa nasıhattaý ónerdiń basty mindeti.
Taraz qalasyndaǵy «Balasaǵun» ortalyq konsert zalynda oblystyq mádenıet, arhıvter jáne qujattama basqarmasynyń jáne jergilikti fılarmonııanyń uıymdastyrýymen «Jańarǵan Jambylym» atty I respýblıkalyq estrada ánshileriniń konkýrsy ótti. Qazylar alqasynyń qatysýymen ótken baspasóz máslıhatynan soń bastalǵan konkýrstyń ashylý saltanatynda basqarma basshysy Dúısenáli Byqybaev sóz sóılep, talapkerlerge sát-sapar tiledi.
Jalpy, atalǵan konkýrsqa qatysýǵa elimizdiń ár óńirinen 70-ke jýyq ónerpaz ótinish bildirgen eken. Alaıda synnan ótken 33 talapker ǵana konkýrsqa qatysýǵa múmkindik alypty. Elimizdiń Astana, Almaty, Aqtóbe, Oral, Semeı, О́skemen, Kókshetaý, Qaraǵandy, Balqash, Qyzylorda, Túrkistan, Shymkent jáne Taraz qalalarynan, Jambyl oblysynan, sondaı-aq Qyrǵyz Respýblıkasynan kelgen ónerpazdar Áýlıeata tórinde óz ónerlerin kórsetti.
Jergilikti kompozıtorlardyń ánderin shyrqap, halyqqa nasıhattady. Al úmitkerlerge laıyqty baǵasyn berý úshin Qazaqstan Respýblıkasynyń Halyq ártisi Altynbek Qorazbaev, Qazaqstannyń Eńbek sińirgen ártisi Baǵdat Sámedınova, Qazaqstannyń Eńbek sińirgen qaıratkeri Meırambek Bespaev jáne ózge de belgili ónerpazdar konkýrsqa arnaıy qatysyp, qazylyq jasady.
Konkýrstyń Bas júldesin tarazdyq Meıirjan Samyltyrov jeńip alsa, júldeli I oryndy tarazdyq Aqerke Qurban men qaraǵandylyq Gúlnar Kóshenova ıelendi.
Sondaı-aq II oryn tarazdyq Baldat Beıseqoja men jambyldyq Qazbek Ábýge buıyrdy. Al III orynǵa tarazdyq Janna Asanqulova, taldyqorǵandyq Halıd Orynqul men óskemendik Aıkerim Bıtanova qol jetkizdi. «Jas talant» atalymymen tarazdyq Berik Jorabekov, «Jarqyn daýys» atalymymen Ońtústik Qazaqstan oblysynan kelgen Nursultan Baıgýnov, «Jańa esim» atalymymen tarazdyq Darhan Qabyl jáne «Kórermender kózaıymy» atalymymen astanalyq Aıdos Ergesh marapattaldy. Jeńimpazdar men júldegerlerge qarjylaı syılyqtar tabystalsa, qalǵan 21 ónerpazǵa da Alǵys hattar men qarjylaı syıaqylar berildi.
Mádenı shara sońy «Rızamyn týǵan halqyma!» atty qaıyrymdylyq konsertine ulasty. Sahna tórinde Altynbek Qorazbaev, Baǵdat Sámedınova, «Taraz» trıosy jáne jeńimpazdar men júldegerler án shyrqady. Al konsertten túsken qarajat «Dýlat baba» qaıyrymdylyq qoryna aýdarylatyn bolady. Sondaı-aq konsertke kelgen kópshilik oblystyq mýzeıdiń uıymdastyrǵan «Kóne Taraz shaqyrady» kórmesimen de tanysty.
Hamıt Esaman,
«Egemen Qazaqstan»
Jambyl oblysy
