«Bizdiń kezdesýimiz Qazaqstan-Qytaı yntymaqtastyǵynyń joǵary deńgeıin rastaıdy. Bıyl ekijaqty dıplomatııalyq qarym-qatynastardyń ornaǵanyna 25 jyl toldy. Osy ýaqyt ishinde elderimiz arasyndaǵy yntymaqtastyq udaıy ósý jáne nyǵaıý jolymen damyp keledi. Bul, kóbinese, bizdiń memleket basshylarymyzdyń turaqty baılanystary arqysynda múmkin bolyp otyr», – dedi Q. Ábdirahmanov.
Kelissózder barysynda taraptar saıası jáne saýda-ekonomıkalyq salalardaǵy, onyń ishinde transshekaralyq sý resýrstaryn paıdalaný, sondaı-aq konsýldyq máseleler boıynsha is-qımyl jasaý salasyndaǵy yntymaqtastyq máselelerin qarady. О́zekti máseleler boıynsha dıalogti strategııalyq áriptestik rýhynda damytý mańyzdylyǵy atap kórsetildi.
Sondaı-aq mınıstrler Prezıdent Nursultan Nazarbaevtyń bıylǵy 14-15 mamyrda Beıjińde ótetin «Bir beldeý, bir jol» atty halyqaralyq forýmǵa qatysýyna, sondaı-aq QHR Tóraǵasy Sı Szınpınniń 7-9 maýsymda Astanaǵa resmı saparyna daıyndyq máselelerin talqylady. Eki memleket basshysynyń qatysýymen 8-9 maýsymda Astanada ótetin Shanhaı yntymaqtastyq uıymynyń Sammıti de iri halyqaralyq oqıǵaǵa aınalmaq.
QHR Syrtqy ister mınıstri Qazaqstan men Qytaı arasyndaǵy egjeı-tegjeıli strategııalyq áriptestik jańa sıpatta damıtynyna senim bildirdi. Onyń pikirinshe, yntymaqtastyqty kúsheıtýde eki el lıderleri arasyndaǵy jeke dostyq, jıi baılanystar men ózara senim erekshe rólge ıe.
«Prezıdent Nursultan Nazarbaevtyń basshylyǵymen Qazaqstan halqy qaryshty ósý men turaqty damý jolyna kóshti. El mańyzdy reformalardy iske asyra otyryp, zamanaýı qadamdar jasaýda», – dedi qytaılyq mınıstr.
Kelissózder qorytyndysy boıynsha taraptar Qazaqstan men Qytaı syrtqy ister mınıstrlikteri arasyndaǵy 2017-2019 jyldarǵa arnalǵan yntymaqtastyq týraly memorandýmǵa qol qoıdy. Bul – aldaǵy úshjyldyq kezeńge arnalǵan syrtqy ister mınıstrlikteri arasyndaǵy ekijaqty ózara is-qımyl jasaýdyń «jol kartasyna» aınalatyn qujat.
Mınıstrler Qazaqstan-Qytaı ekijaqty yntymaqtastyǵynyń ózekti máseleleri men halyqaralyq ister boıynsha, onyń ishinde Qazaqstan Respýblıkasynyń BUU Qaýipsizdik Keńesinde 2017-2018 jyldardaǵy turaqty emes músheligi sheńberinde kezdesýler men konsýltasııalar ótkizip turýǵa ýaǵdalasty.
Taraptar Azııadaǵy senim sharalaryn nyǵaıtý mańyzdylyǵyn atap ótti. Sondaı-aq Azııadaǵy ózara yqpaldastyq jáne senim sharalary jónindegi keńes sheńberinde yntymaqtastyqty damytýǵa ýaǵdalasty.
«Búgin uıymǵa qatysýshylar arasyndaǵy yntymaqtastyq pen senimdi nyǵaıtýǵa yqpal etetin kópjaqty dıplomatııanyń tıimdi quraly retinde AО́SShK-ge qatysty oń kózqaras qalyptasty», – delingen qujatta.
Aıdar О́RISBAEV,
«Egemen Qazaqstan».
