Keshe Qazaqstan Respýblıkasy Tuńǵysh Prezıdenti – Elbasy N.Nazarbaev kitaphanasynda osy máselege arnalǵan «Prezıdenttik ınstıtýt – Qazaqstan Respýblıkasyndaǵy memlekettiliktiń negizi» atty dóńgelek ústel bolyp ótti. Ony kitaphana dırektorynyń orynbasary Beısembaı Jumabekov ashyp, júrgizip otyrdy. О́ziniń kirispe sózinde ol elimizdiń tabysty memleketke aınalýy – prezıdenttik basqarý ınstıtýtyn tańdap alǵan Elbasymyzdyń kóregen saıasatynyń arqasy ekenin atady. Prezıdent elimizde dinaralyq jáne konfessııaaralyq kelisimderdi ornata otyryp, qazaqstandyqtardy bir maqsattyń jolyna toptastyra bildi, dedi ol.
Dóńgelek ústelde negizgi baıandamanyń birin Prezıdent janyndaǵy Memlekettik basqarý akademııasynyń professory Zınaıda Fedotova jasady. Ol elimizdegi prezıdenttik basqarý ınstıtýtynyń qalyptasýy men tıimdiligi, táýelsiz Qazaqstandy damytýdyń kúrdeli jáne jaýapty kezeńderi týraly aıtyp berdi. «Qazaqstan prezıdenttik basqarý úlgisinde qalyptasýdyń jáne damýdyń tabysty jolynan ótti. Jas memlekettiń aıaqqa nyq turýy jáne nyǵaıý jyldarynda, daǵdarysqa qarsy reformalar men barlyq qoǵamdyq salalardy jańǵyrtý kezeńderinde myqty prezıdenttik bılik aıryqsha qajet edi. Búgingi tańda Qazaqstan jańǵyrýdyń jańa kezeńderine qadam basqandyqtan memlekettilikti nyǵaıtý, demokratııany odan ári damytý máselesi ózekti. Qazaqstandaǵy prezıdenttik ınstıtýt ýaqyt synynan ótip, saıası turaqtylyq pen qaryshty ekonomıkalyq damýdy qamtamasyz etti», dedi ol óziniń sózinde.
Táýelsiz Qazaqstannyń tuńǵysh Syrtqy ister mınıstri bolǵan Tóleýtaı Súleımenov óziniń sózin negizinen mınıstrliktiń qalyptasýy men damýyna arnady. Qaı kúnde izasharlarǵa bári de qıyn bolady ǵoı, biz de sony bastan keshtik. Tek hattamalyq qaǵazdar toltyrýmen ǵana aınalysqan onshaqty mamannan ǵana turatyn mınıstrlikti táýelsiz eldiń derbes dıplomatııalyq qurylymyna aınaldyrý ońaı bolǵan joq. KSRO Syrtqy ister mınıstrliginiń qurylymdarynda qyzmet istep júrgen 22 qazaqstandyqty shaqyryp, alys-jaqyn shet eldermen dıplomatııalyq jumystardy júrgizýde solardyń tájirıbesi men bilimderin paıdalandyq.
«Elbasy N.Nazarbaev óziniń «Qazaqstan joly» kitabynda memlekettik qyzmettiń mańyzdy salasy – dıplomatııalyq jumystardy taqyr jerden bastaýǵa týra kelgenin atap ótken. Bizge áýeli Qazaqstannyń ekonomıkalyq áleýetiniń, geosaıası ornalasýynyń taldaýyn jasap, elimizdiń halyqaralyq qarym-qatynastardaǵy rólin jáne ornyn anyqtaý talap etildi. Dıplomatııalyq múmkinshilikter arqyly elimizdiń ishki damýyna qolaıly jaǵdaılar qalyptastyrý máselesi alǵa qoıyldy. Osyndaı talaptardy oryndaı otyryp, biz jalpy turaqtylyqty jáne qaýipsizdikti nyǵaıtýǵa, ózara tıimdi yqpaldastyqty damytýǵa baǵyttalǵan syrtqy saıasat qalyptastyrdyq. Bizdiń dıplomatııanyń negizgi qaǵıdalary belsendilik, teńgerimdilik, pragmatızm, konstrýktıvti únqatysý jáne jan-jaqty yqpaldastyq», dedi óziniń sózinde Tóleýtaı Súleımenov.
Prezıdent janyndaǵy Qazaqstannyń Strategııalyq zertteýler ınstıtýtynyń dırektory Zarema Shaýkenova Elbasy N.Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy talaptarǵa toqtalyp, olar táýelsiz memlekettiń evolıýsııalyq ósý jolyndaǵy sanany jańǵyrtý isinde mańyzdy ról atqaratyndyǵyn atap ótti. Sonyń ishinde qazaq tili jazýynyń latyn álipbıine kóshýi basqa halyqtardyń múddesine qol suqpaıtyndyǵyn jetkizdi.
L.N.Gýmılev atyndaǵy Eýrazııa ulttyq ýnıversıtetiniń professory Natalıa Kalashnıkova óziniń sózinde qazirgi memleketterdiń damýy – tıimdiligi myqty, jaýapty jáne kreatıvti ulttyq kóshbasshylarǵa baılanysty ekenin aıta kelip, N.Nazarbaevtyń naq sondaı tulǵa ekenin aıtty. Al Elbasy kitaphanasynyń jetekshi ǵylymı qyzmetkeri, professor Ǵazız Telebaev óziniń sózinde Elbasynyń bastamasymen qolǵa alynǵan «Máńgilik El» ıdeıasynyń mańyzdylyǵyna toqtaldy. «Máńgilik El» Patrıottyq aktisiniń aıasyndaǵy jalpyulttyq biregeılikti qalyptastyrý birqatar jyldarǵa sozylatyn sharýa, ony kezeń-kezeńmen atqarǵan jón. Eń bastysy – biregeılikti qalyptastyrý qoǵamdyq sananyń jańǵyrýyn talap etedi. Elbasy «Bolashaqqa baǵdar: rýhanı jańǵyrý» baǵdarlamalyq maqalasynda bul týraly mazmundy pikirler aıtqan», dep atap ótti ol.
Dóńgelek ústel jumysynyń qorytyndysy boıynsha qarar qabyldandy jáne jasalǵan baıandamalar jeke jınaq bolyp jaryqqa shyǵatyndyǵy aıtyldy.
Dóńgelek ústeldiń jumysyna ǴZI men ortalyqtardyń, Memlekettik basqarý akademııasy men kóptegen JOO-lardyń professorlyq-oqytýshylar quramynyń ókilderi, áleýmettik-saıası damýdyń sarapshylary, Konstıtýsııalyq Keńes músheleri men Parlament depýtattary qatysty.
Dóńgelek ústel óz jumysyn aıaqtaǵan soń jınalǵandar úshin osy ǵımaratta «Dáýir toǵysynda» atty kórme usynyldy. Onda prezıdenttik ınstıtýttyń qalyptasýy men damý joldary tarıhı qujattarmen, fotosýrettermen, kitaptarmen jáne basqa da jádigerlermen keńinen tanystyryldy. Sonyń ishinde Prezıdent N.Nazarbaevqa sheteldik memleket basshylary men delegasııalardan syıǵa tartylǵan buıymdar, syıkádeler, tarıhı jádigerler jáne t.b. boldy.
Jaqsybaı Samrat,
«Egemen Qazaqstan»
