Elbasynyń: «Qazaq dalasynda san túrli ult ókilderi qonys tepken. Tegi basqa bolǵanymen teńdigi bir, qany bólek bolǵanymen jany bir, armany ortaq birtutas halyqqa aınaldyq» – degen sózi jadymyzda jattaýly. Sondyqtan, keńbaıtaq qazaq jeriniń qaı óńirinde ómir súreıik, maqsatymyz ortaq, áreketimiz ben múddemiz bir. Mysaly, Ońtústik Qazaqstan oblysynda 35 myńnan astam tájik etnosynyń ókilderi turady. Olardyń barlyǵy, onyń ishinde men de osy eldiń patrıotymyz. Júregim de, kóńilim de qazaq jeri dep soǵady. Onyń bolashaǵy – meniń de bolashaǵym. Eger memleketimizdiń ekonomıkasy nyǵaısa, osy jerde ǵumyr keship jatqan barlyq halyqtardyń da ál-aýqaty, turmys jaǵdaılary jaqsaratyndyǵy belgili.
Osy oraıda, Memleket basshysy N.Nazarbaevtyń tapsyrmasy boıynsha Úkimet iske asyrýǵa kirisken «Nátıjeli jumyspen qamtý jáne jappaı kásipkerlikti damytý» baǵdarlamasynyń el turǵyndaryna bereri mol. Eńbekke qabiletti azamat óziniń kúsh-qýatyn eldiń damýyna úles qosý úshin, tipti, óz otbasy turmysyn jaqsartý úshin qaı óńirde bolsyn jumys isteýge daıyn bolýy tıis. Mine osy turǵydan alǵanda halqy tyǵyz ornalasqan, demografııalyq ósimi joǵary ońtústik óńiriniń eńbekke belsendi azamattary arasynda soltústik oblystarda jumys isteýge nıet bildirýshiler kóbeıip keledi. Kúni keshe oblys ákimdiginiń, tıisti mınıstrliktiń uıymdastyrýymen Saryaǵash, Maqtaaral aýdandarynda ótken is-sharalar jergilikti turǵyndarǵa naqty baǵyt-baǵdar berdi. Ońtústikke arnaıy kelgen Qostanaı, Pavlodar, Soltústik Qazaqstan, Shyǵys Qazaqstan oblystarynyń ókilderi kóptegen usynystar aıtty. О́ńirlerdegi jaǵdaımen jaqyn tanystyryp, bos jumys oryndary jóninde keń maǵlumat berdi. Maqtaaral aýdany turǵyndarynyń qyzyǵýshylyǵyn týdyrdy. Bóle jarǵanym emes, soltústik óńirlerge baryp jumys isteýge nıet bildirip otyrǵan tájik baýyrlarymnyń qatary kóbeıdi. Otbasymyzben, áýletimizben birge kóship barsaq dep otyrǵan tájik jastary kóp. Úkimet, jergilikti ákimdik jer telimderin beremiz, jumyspen qamtamasyz etemiz, alǵashqy kezde jaǵdaı jasaımyz dep otyrsa, nege barmasqa?! Endi aldaǵy ýaqytta Maqtaaral aýdanynyń ákimi Ǵalym Ybraıuly is-shara josparyn jasap, soǵan sáıkes jumys oryndaryn usynyp otyrǵan oblystardaǵy jaǵdaımen tanysyp qaıtpaqpyz. Baryp kelgen soń eńbekke belsendi azamattardy, jastardy sol jaqqa jumysqa alyp barýǵa kirisemiz. Kóshýge nıettilerdiń arasynda aýyl sharýashylyǵy salasy boıynsha mamandyq alǵan jastar da kóp. Jer bólinse, ter tógip eńbeginiń jemisin kórgisi keletin dıqandar da az emes. Mádenıet, bilim, sport salasynda eńbek etkisi keletinder de barshylyq. Joǵaryda aıtyp ótkenimdeı, Maqtaaral aýdanynda halyq tyǵyz ornalasqan. Onyń ishinde, 9-10 ul-qyz tárbıelep otyrǵan kópbalaly tájik otbasylary kóp. Olardyń barlyǵyna aýdanda jumys tabyla bermeıdi. Sondyqtan da, elimizdiń ózge óńirlerinde eńbek etýge qulshynys tanytýda. Qysqasy, halqy tyǵyz ornalasqan aımaqtaǵy jumys kúshin ózge óńirler arqyly tıimdi paıdalanýdy kózdep otyrǵan Eńbek jáne halyqty áleýmettik qorǵaý mınıstrliginiń, oblys ákimdikteriniń bul bastamalary jergilikti jerlerde qoldaý tabýda.
Joldas SULTANOV,
«Ońtústik Qazaqstan oblystyq tájik mádenı ortalyǵy» qoǵamdyq birlestigi tóraǵasynyń mindetin atqarýshy
