Akademıkke qurmet

Lev Gýmılev atyndaǵy Eýrazııa ulttyq ýnıversıtetinde jyl saıynǵy Ilenkov oqýlaryna oraı ótken «Fılosofııa jáne mádenıet» atty HIII halyqaralyq ǵylymı konferensııanyń aıa­synda akademık Jabaıhan Ábdil­dın atyndaǵy aýdıtorııanyń ashylý rásimi ótti Evald Ilenkov keńestik kezeńniń kórnekti fılosofy. Dıa­lektıkalyq dástúrdiń damý etap­ta­ryn qalyptastyrǵan tulǵa. Onyń eńbekteri álemdik fıloso­fııalyq oıdyń qazynasyna aı­nalǵan. Sóz reti kelgende aıta ketelik, 1990 jyly fılosofııa ǵy­lym­darynyń doktory S.Mareev Ilen­kov oqý­laryn ótkizý týraly ıdeıa tastap, soǵan oraı 1991 jyly Reseıde alǵash ret konferensııa ótkizilgen bolatyn. Sodan beri dástúrge aı­nalǵan jyl saıynǵy Ilenkov oqýlary 1999 jyly halyqaralyq konferensııa statýsyn ıemdengen. Halyqaralyq deńgeıdegi atalmysh konferensııa akademık Jabaıhan Ábdildınniń jetekshiligimen  Qa­zaq­standa tuńǵysh ret ótkizildi. Bir aıta keter jaıt, osy jıyn aıasynda L.N.Gýmılev atyndaǵy EUÝ áleýmettik ǵylymdar fakýltetinde fılosofııa ǵylym­dary­nyń doktory, professor Jabaıhan Ábdildınniń atyn­daǵy je­ke aýdıtorııanyń ashylý sal­tanaty ótti. Akademık Jabaıhan Ábdildın – 100-den astam ǵylymı eńbek­terdiń, onyń ishinde otyzdan asa monografııalardyń avtory. Onyń eńbekteri álemniń kóptegen elderinde, atap aıtqanda Anglııa, Germanııa, Ýkraına, Reseı, Fransııa elderinde jaryq kórgen. Ol Qa­zaqstan Respýblıkasy Prezıdenti­niń Beıbitshilik jáne rýhanı kelisim syılyǵynyń, sondaı-aq Memleketik syılyqtyń laýreaty. Sońǵy dızaın úlgisimen salyn­ǵan aýdıtorııa ishi akademık eńbek­terimen jabdyqtalǵan. Munda Jabaıhan Múbárákuly jaıly aqpa­rat izdep, eńbek­terimen tanysqysy kelgender úshin taptyrmas múm­kindik baryna kóz jetkizdik. Onda akade­mık­tiń jas kúninen bergi ómiri to­lyq qamtylǵan. Eńbekteri de jeterlik. Árıne, básekege qabi­letti ǵa­lym mundaı qurmetke ábden laıyqty. Juldyz BAIDILDA.