Jaqynda Qazaqstan Respýblıkasynyń Vena qalasyndaǵy Halyqaralyq uıymdar janyndaǵy jańadan taǵaıyndalǵan turaqty ókili Qaırat Ábdirahmanov Birikken Ulttar Uıymynyń О́nerkásiptik damý jónindegi (IýNIDO) Bas dırektory Kande Iýmkellaǵa senim gramotasyn tapsyrdy.
Talǵat JUMAǴULOV, «Egemen Qazaqstan» – Venadan.
Rásim kezindegi áńgimede Qazaqstan men IýNIDO arasyndaǵy ózara is-qımyl máseleleriniń keń aýqymy talqylandy. Uıymnyń mańyzdy róli, sondaı-aq onyń damýshy jáne ótpeli kezeńde elderge tıgizetin paıdasy atap ótildi. IýNIDO basshysynyń nazary Qazaqstan Úkimetiniń ekonomıkany ártaraptandyrý baǵytynda údemeli ındýstrııalyq-ınnovasııalyq damý baǵdarlamasynyń qabyldanýyna aýdaryldy. Elimizdiń tehnıkalyq yntymaqtastyqtyń naqty jobalaryn iske asyrýǵa qyzyǵýshylyǵy quptaldy. Al K.Iýmkella 2010 jyly shilde aıynyń basynda Qazaqstanǵa jasaǵan saparyn jyly lebizben eske aldy. Bul IýNIDO basshysynyń Ortalyq Azııaǵa jasaǵan tuńǵysh sapary edi. Bas dırektor damýshy elder ındýstrııalyq saıasatty iske asyrý jolynda egjeı-tegjeıli josparlap, maqsatty áreket jasaýlary tıis, dedi. Osy oraıda Qazaqstannyń shıkizat baǵyttylyǵynan qutylyp, ekonomıkany ártaraptandyrýǵa barlyq múmkindigi bar. K.Iýmkella IýNIDO-nyń barynsha qolǵabys kórsetýdi jalǵastyra beretinine sendirdi. Sondaı-aq 22-24 maýsymda Vena qalasynda ótetin IýNIDO elderiniń ónerkásiptik damý jónindegi keńesiniń 39-shy májilisine daıyndyq týraly habardar etti.
