Jıyn maqsaty – jastar arasyndaǵy túsinistikti nyǵaıtý

Keshe Beıbitshilik jáne kelisim saraıynda «Qazaqstandyq jastar: toleranttylyq jáne konfessııaaralyq únqatysý arqyly ózara túsinistik pen yntymaqtastyqqa qol jetkizý» atty respýblıkalyq ǵylymı-tájirıbelik konferensııa ótti. Birikken Ulttar Uıymy Bas Assambleıasynyń 2009 jylǵy jel­toq­san aıynda qabyldaǵan №64/134 qarary boıynsha 2010 jyldyń 12 tamyzynan 2011 jyl­dyń 11 ta­myzyna deıingi merzim «Únqatysý jáne ózara túsinistik» uranymen ótetin halyqaralyq jastar jyly bolyp jarııalanǵan bo­la­tyn. Konferensııa osynyń negizinde uıym­dastyrylyp otyr. Al maqsaty – qazaqstandyq qo­ǵam­dy qurap otyr­ǵan jas býyn­nyń múm­kin­digin ashý, qoǵamdaǵy tolerant­ty­lyq pen konfessııa­aralyq únqa­ty­sýdy da­mytýdaǵy qazaqstandyq jastar rólin aı­qyndaý, túrli mádenıetter men din­derdi ustana­tyn jastar ara­syndaǵy ózara túsinistik pen yntymaqtastyqty nyǵaıtý, Qazaq­stannyń zaıyrly jáne dindar jas­taryn Mádenıet mınıstrli­giniń Mádenıetter men dinderdiń ha­lyqaralyq ortalyǵy janynda qurylatyn Astana qala­synyń dindar jastarynyń keńesi aıasyna biriktirý. Memlekettiń ishki saıasatynda júzege asyrylatyn qýatty stra­tegııalyq basymdyqtarynda áleý­mettik-saıası jáne dinı keńistikte jastardyń orny erekshe. Bul jóninde Parlament Senatynyń depýtaty Ǵarıfolla Esim: «Jastar – bolashaq pen ótkenniń ara­syn jalǵastyrýshy. Sondyqtan olarǵa túzý baǵyt berýimiz kerek. Bul rette, mundaı basqosýlardyń mańyzy zor. Din – úgit-nasıhat nemese ateızm emes ekendigine nazar aýdaryp, jastarǵa dindi má­de­nıettiń fenomeni retinde qaraýdy qolǵa alýymyz kerek», – dedi. Mádenıet vıse-mınıstri Ǵa­zız Telebaev «Qazaqstandaǵy jas­tar saıasaty jáne din» taqy­rybyndaǵy baıandamasynda din­niń qoǵamdaǵy orny erekshe, din adamdardy jaqsylyqqa jeteleýshi ońdy úrdis ekendigine, jas­tarymyzdyń dinge oń kózqaras tanytyp, dinge betburýy kóńil kónshitetindigine, alaıda, elimizge dástúrli dinderden bólek, shet elderden ózge dinı aǵymdar kóptep kelip jatqandyǵyna toqtaldy. Al «Nur Otan» HDP «Jas Otan» jastar qanatynyń atqarý­shy hatshysy Nurlan О́teshev: «Jastar men olardyń ustanatyn dini – bú­gingi tańda barshamyzdy alań­da­ta­dy. Ǵazız Turysbek­ulynyń jasaǵan baıandamasy oıǵa qonymdy boldy. Osy jobaǵa qatysty kórsetiletin kómekterge bizdiń, ıaǵnı «Jas Otan» JQ da atsalysýyna ruqsat etińiz­der», – dep izgi nıetin usyndy. Mádenıet mınıstrligi janyn­daǵy Mádenıetter men dinderdiń ortalyǵy Prezıdent Nursultan Nazarbaevtyń Álemdik jáne dás­túrli dinder lıderleriniń úshin­shi sezindegi aıtqan bastamalaryn júzege asyrý negizinde qurylǵan. Adamzat ómiriniń mańyzdy sala­larynda oryn alǵan jahandaný jáne ıntegrasııa úrdisteri birinshi kezekte halyqtardyń biregeıligin damytý, tarıhty saqtaý, mádenıetti, til men dindi damytý tárizdi máselelerdi aldyńǵy orynǵa shyǵaratyndyǵy belgili. Konferensııada kóterilgen má­se­leler 2012 jyly ótetin Álem­dik jáne dástúrli dinder lıder­leriniń tórtinshi sezinde talqy­lanatyn bolady. Bul sezde jastar jáne áıelder seksııalary ju­mys isteıdi dep josparlanyp otyr. Juldyz BAIDILDA.