Aqparattyq karta ázirlenýde

Keshe Premer-Mınıstr Kárim Másimovtiń tóraǵalyǵymen selektorlyq rejimde Úkimet otyrysy ótti. Onda Ekono­mı­ka­lyq damý jáne saýda mınıstri Qaırat Kelimbetov «Memleket basshysynyń bergen tapsyrmalaryn iske asyrý jónindegi kór­neki aqparattyq karta týraly» baıandama jasady. Ekonomıkalyq damý jáne saýda mınıstrligi 2020 jylǵa deıingi elimizdiń strategııalyq damý josparynyń negizgi baǵyttary­men tyǵyz baılanysty Memleket basshysy tapsyrmalaryn iske asy­rýdyń kórneki aqparattyq kartasyn daıyndady. Memleket basshysy osy jyldyń basynda­ǵy el halqyna Joldaýynda, «Nur Otan» HDP-nyń HIII se­zinde jáne Úkimettiń keńeıtilgen otyrysynda ekonomıkalyq, saıası, áleýmettik salalardyń da­mýy­na baǵyttalǵan, sonymen qatar elimizdiń serpindi damýyna múmkindik beretin birqatar mindetterdi alǵa qoıǵan edi. Bul karta elimizdiń ál-aýqatynyń turaq­ty jáne ornyqty ósýine, nátı­je­ge qol jetkiziletin jumysty kór­neki túrde kórsetýge baǵyttal­ǵan. Sonymen qatar karta elimiz­diń jaqyn kezeńde damýynyń negizgi mindetterin, onyń oryndalý merzimin jáne qol jetkizer ná­tı­jesin memlekettik organdardyń birinshi basshylaryna bekite oty­ryp kórsetýge múmkindik bermek. Jalpy, kartanyń Memleket bas­shy­synyń tapsyrmalaryn iske asý barysyn tekserip, qorytyn­dysyn baǵalaýda da bereri mol. Atalmysh karta daǵdarystan keıingi damý, ekonomıkany árta­rap­tandyrýdy jedeldetý, azyq-túlik qaýipsizdigi jáne bolashaqta keletin ınvestısııa syndy aspektilerdi qamtıdy. Sondaı-aq mun­da azamattar úshin kórsetiletin qyzmetter, memlekettik basqarý júıesin damytý, ultaralyq kelisim men qaýipsizdikti jáne halyq­aralyq qatynastardyń turaq­tylyǵyn qamtamasyz etý de nazardan tys qalmaǵan. Atalmysh qujatpen tanys­qan­nan keıin Úkimet basshysy Kárim Másimov óz kezeginde bul qujatqa tıisti tolyqtyrýlar engizý úshin bir aptada ony Úkimettiń veb-saı­tyna ornalastyrýdy tapsyra kele, Úkimet músheleri bul karta­ny qabyldaý úshin kelesi seısenbide daýys beretinin aıtty. Jal­py alǵanda, ol bul qujatta júk­te­lip otyrǵan baǵyttardy durys dep baǵalaıtynyn da tilge tıek etti. Sondaı-aq otyrysta «Gaz jáne gazben jabdyqtaý týraly» zań jobasy da qaraldy. Bul jo­bany tanystyrǵan Munaı jáne gaz mınıstri Saýat Myńbaevtyń aıtýynsha, atalǵan qujatta ishki rynokqa gaz jetkizýge basymdyq beriledi. Jáne de ishki rynokqa taýarlyq gaz jetkizý boıynsha biryńǵaı ulttyq operator qurý­dy kózdeıdi. Bul operator óńdel­gen ilespe gazdy satyp alýda ba­sym quqyqqa ıe bolsa, árbir ob­lys pen qala úshin biryńǵaı kó­ter­me baǵany engizý máselesi de zań jobasynda qarastyrylǵan. Bul rette baǵany Úkimet belgileıtin bolady. Mınıstr munymen qosa, bul zańdy qabyldaý gaz salasynyń aldynda turǵan má­se­lelerdi keshendi sheshýge múm­kindik beretinin de aıtyp ótti. Otyrysta sondaı-aq Kárim Másimov energııa tıimdiligi eli­miz­diń ındýstrııalandyrý baǵy­tyn­da negizgi másele ekendigine de toqtaldy. Munda ol ındýs­trııa­landyrý jáne turǵyn úı-kom­mýnaldyq sharýashylyǵyn jań­ǵyrtý baǵdarlamalary aıasynda elimizde energııa únemdeý máse­lesi alǵashqy orynda turýy qa­jet­tigin qadap aıtty. Sondaı-aq munyń Elbasynyń tikeleı tap­syrmasy ekenine toqtala kele, bul turǵyda barlyq ákimderge ındýstrııalandyrý baǵdarlamasy sheńberindegi barlyq nysandar­dy qarap shyǵýdy tapsyratyn­dyǵyn da qaperge saldy. Selektorlyq keńesten keıin BAQ ókilderine suhbat bergen Munaı jáne gaz mınıstri Saýat Myńbaev jýyr arada mınıstr­likte janarmaı baǵasy talqyla­na­tynyn jetkizdi. Vedomostvo bas­shysynyń aıtýynsha, búgingi tańda dızel otyny men AI-80 markaly benzıniniń baǵasy Mu­naı jáne gaz mınıstrligi men Tabıǵı monopolııalardy retteý agenttigi birlesip belgilegen shekte qalyptasyp otyr. Rynoktaǵy bul ónimderdiń baǵasy dızel otynyna 82 teńgeni, al AI-80-ge 80 teńgeni quraıdy. Jáne muny­men qosa aýyl sharýashylyǵy taýarlaryn óndirýshilerge janarmaı júz paıyz jetkizilgen. Al baǵasy Úkimet bekitken shekti normadan tómen. Mınıstr óz só­zinde janarmaı rynogynda aı­tar­lyqtaı másele týyndap otyr­ma­ǵandyǵyn atap óte kele, áıtse de AI-92, AI-93 benzın marka­lary boıynsha sheshimin tabýy tıis jáıtter bolýy múmkindigin de nazardan tys qaldyrmady. Biz reseılik munaı jetkizilimin esep­ke alǵanda da bul benzındi ózimizde túgeldeı óndirmeımiz. Osy kún­deri Reseıde AI-92 markaly benzın bizdiń valıýtamen alǵanda 125 teńge, al bizde 99 teńge kóleminde bolyp otyr. Árıne, aradaǵy bul 25 paıyz degen biraz aıyrma­shy­lyq. Sondyqtan da bul máse­leler tóńireginde biraz suraqtar kóterilip jatyr. Biz osyǵan oraı, joǵaryda aıtyp ótkendeı, bul máseleni jaqyn arada talqy­laı­tyn bolamyz, – dedi ol. Sonymen qatar osy brıfıngte Aýyl sha­rýashylyǵy mınıstri Asyljan Mamytbekov kóktemgi egiske arzan baǵamen jetkiziletin 354 myń tonna jaǵarmaıdyń 290 tonnasy­nyń quny tólengenin aıta kele, búgingi kóktemgi egis naýqany jumystary tóńireginde tuqym jáne ózge de qajettilikter boı­yn­sha týyndap otyrǵan másele­ler joqtyń qasy ekendigin aıtty. Sondaı-aq ol ótken aptalarda bank­tik kepildemelerdi alýǵa múm­kindikteri tómen aýyl sharýashy­lyǵy taýarlaryn óndirýshilerdi Áleýmettik kásipkerlik korporasııalar kepildigimen qarjylan­dy­rý sheshimi jasalǵanyn jáne bul sharalardyń nátıjesinde tó­lemder operatorlarǵa ýaqytynda jetkizilgendikten jaǵarmaıdy jetkizý kólemi aıtarlyqtaı art­qanyn da baıandap ótti. Osyǵan sáıkes kóktemgi egiske arnalǵan jaǵarmaıdy jóneltýdi munaı óńdeý zaýyttary da arttyra túsken. Ábdirahman QYDYRBEK.