Almatydaǵy alapat

Seısenbiniń keshinde Almaty tabıǵaty taǵy da tosyn minez tanytty. Burshaq aralas jań­byr­dyń sońy dúleı daýylǵa ulasyp, keı aýdandarda taldar qulap, elektr jelileri úzildi. Medeý, Shymbulaq demalys oryndaryna aparatyn qasqa joldyń boıyn­daǵy júz jyldyq aǵashtar opy­ry­lyp, sonyń saldarynan bir qyz aýyr jaraqat aldy, bir jigit ómirimen qoshtasty. Qatty daýyldan qala shetindegi aýdandar men oblys aımaǵy zardap shekti. Almaty qalalyq tabı­ǵı resýrstardy baqylaý bólimi mamandarynyń aıtýynsha, daýyl kezinde Almaty qalasynda 174 túp, Medeý-Shymbulaq baǵytynda 500 túp, al Medeý jáne Ile-Alataý ulttyq saıabaǵynda 6 myń túp aǵash opyrylyp qulaǵan. Taraz qa­lasynyń turǵyny men onyń qur­bysy ornalasqan shatyrdy aǵash basyp qalyp, bir adam ja­zym bol­dy. Qalalyq qutqarý qyzmetiniń mamandary Tuıyqsý shatqalynda demalyp jatqan 4 Reseı azamatyn qaýipsiz aımaqqa shyǵarǵan. Basqa zııan shekken adam joq. Almaty qalalyq gıdrometeoor­ta­lyǵynyń bastyǵy Qýanyshbek Baıa­dilovtiń aıtýynsha, atalmysh or­talyq aldyn-ala sol kúngi jel­diń ekpinin sekóntine 13 metr dep jobalaǵan. Alaıda, arnaıy quryl­ǵy­lardyń kórsetýi boıynsha jel­diń jyldamdyǵy sekóntine 14 metr­den asyp ketken. Bul qaýip týdy­ratyn deńgeıden joǵary kórsetkish degendi bildiredi. Bir aıta ketetin jáıt, Almatyda kóktemgi qýraǵan aǵashtardy otaý isi júrgizilip, qaı­ta úlken apattyń aldyn orap úl­gerippiz. Áıtpese, on myńnan asa qulaǵaly turǵan aǵashtardy ýaq­tyly kesip tastamasa, nátıjesi tym alańdatarlyq bolar edi. Daýyl saldarynan qalada 20 gaz qubyrynyń zaqymdalý oqı­ǵasy, 31 elektr júıesiniń úzilý faktisi tirkelgen. Qalalyq ákim­dik apta so­ńyna deıin qala ishindegi jáne japsarlas aýdandardaǵy jol boıynda qu­laǵan aǵashtardy tazartyp, qa­lyp­ty jaǵ­daıdy ornatamyz dep otyr. Qanat ESKENDIR, jýrnalıst. Almaty.