Memlekettik rámizder alańy ashyldy

Qazaqstannyń altyn kúnge bir taban jaqyn qalasy Shymkent jyl ótken saıyn ajarlanyp keledi. Elbasy da osy oblysqa issaparynda: “Shymkent shyraıly shahar”, degendi mereılenip aıtqan edi. Oblysta Qasymbaı Ábdiqalyq degen kásipker jigit bar. Birde Almatydan dostary kelipti. “Iship-jem, eshteńeden kende emespiz, Elbasynyń ózi maqtaǵan qalańdy kórsetpeısiń be? – deıdi ǵoı. “Oıpyr-oı” – deıdi Qasymbaı. Kúnde ortasynda júrgen soń baıqamaıdy ekenbiz. Qala keremetteı ózgeripti. Anaý dendrobaq túnde túgili kúndiz kirseń qorqynyshty edi. Qazir ertegidegi ıran baǵyndaı jaınap tur. Buryn qıyr-shıyr bazar basqan qala ortasyndaǵy Shámshi gúlzary qandaı?! Eki-úsh jylda osyndaı jıyrmadan astam nysandar boı kóte­ripti. Astana, Almatyny kórgen, eshte­ńe­ge tań qala qoımaıtyn dostarym “Shym­kent – sulý qala” eken dep tańdanyp qaıtty. Men de qýandym. Bir taban jaqyn júresizder ǵoı, oblys ákimi men qala ákimine jurttyń rızashylyǵyn jetkizińizshi” degen. Reti keldi. Qasymbaı-Qasekeń qashan ashylady eken dep kútken taǵy bir nysan paıdalanýǵa berildi. Kúni keshe Tóle bı, Qazybek bı jáne Áıteke bı kósheleri toqaılasyp jatqan Ordabasy alańyndaǵy Táýelsizdik monýmentin jalǵastyratyn Memlekettik rámizder alańy ashyldy. Qoshqar ata ózeninen aǵyp baratyn eki sý burqaq aıasyndaǵy “Otan Ana” músininiń bıiktigi segiz metr. Keshenderdi aspaly kópir baıla­nys­t­yryp jatyr. Shyrqaý bıikte shahar ústinde jelbiregen Qazaq­stannyń kók baıraǵy eńsesi bıik eldiń áleýetin tanytqandaı kózge urady. Ashylý saltanatynda oblys ákimi As­qar Myrzahmetov sóz sóıledi. Bıyl elimiz úshin erekshe jyl ekeni belgili, – de­di ob­lys basshysy. – Ol tarıhı – Táýel­siz mem­leketimizdiń 20 jyldyǵy. Bul toı toılaý emes. Shyn máninde táýel­sizdik bizge ne berdi? Qandaı jetistikterge jettik? Oǵan qurmetimiz qandaı? Osy talaptar turǵy­synda taldaýǵa tıispiz. Shú­kir, memleket­tik rámizderimiz resmı túrde mártebe aldy. Ashylyp otyrǵan búgingi nysannyń árbir elementi syr shertedi, oı tarqatady. Qa­zaq­stannyń kartasynda mem­leket quraý­shy eldiń ótkeni men bú­gini, urpaqtar sa­baqtastyǵy jaıynda El­basymyzdyń qa­nat­ty sózderi jazylsa, janynda turǵan 7 tuǵyrdyń sımvolı­ka­lyq mańyzy zor. Keń baıtaq týǵan jeri­miz­di qorǵap qalǵan naı­zany elestetedi. El qaýipsizdiginiń qorǵany degendi bildi­redi. Táýelsizdikke taǵzym eń aldymen memlekettik rámizderge qurmet kórse­tý­den bastalady. Budan keıin oblys basshysy bız­nes­tiń áleýmettik jaýapkershiligi aıasynda osy nysandardy iske qosýǵa atsalysqan kásipkerlerge alǵys hat tapsyrdy. Ary qaraı alańda segiz gektar aý­maq­ty alyp jatqan «Táýelsizdik saıa­baǵy» jalǵasady. Saıabaq temir jol vokzaly jaǵynan bıiktigi – 15 metr, eni – 50 metr bolatyn saltanatty qaqpamen ashylady. Keń alleıanyń aınalasyna túrli gúlder otyrǵyzylǵan. Gúlzarlar táýelsizdigi­miz­diń ár jylyndaǵy eleýli oqıǵalar sıpat­talǵan estelik belgilermen tolyqqan. Bolashaqta saıabaqtyń ortalyǵynda «El birligi» monýmenti turǵyzylady. Myq­­ty granıtti stılobatta Qazaqstan halqynyń barelefimen «Shańyraqty» ustap turatyn 137 qıǵash ýyqtan quralǵan kompozısııa turǵyzylýda. Bul ýyqtar Qazaqstanda turatyn halyqtyń berekeli birligi men yrysty yntymaǵyn bildiredi. Saıabaqqa kelgen qala turǵyndary men qonaqtardy rýhanı baılyqpen sýsynd­a­ta­tyn keshenniń máni – el birligi. “Baq qaıda barasyń, yntymaqqa baramyn” degen osy. Baqtııar TAIJAN, ShYMKENT. Sýretti túsirgen Hýsan Azızov.