Qazaq mine, júzi jarqyn, qoly ashyq

Bizdiń salt-dástúrimiz, ádet-ǵurpymyz, mádenıetimiz zaman qansha jerden jańarǵanymen, ur­paq aýysyp, jahandanýdyń elesi qoǵamdy dańǵaza áýenge elitkenimen, asyldy tat baspaıtyny, syrly aıaqtyń syry ketse de sy­ny ketpeıtini sııaqty  sol kúı­in­de saqtalyp keledi. О́ıtkeni, sol qundylyqtar óshken kúni bizdiń  ulttyq, ózindik ereksheligimiz ben bet-beınemiz de joıylady. Kez kelgen mádenı shara barysynda ulttyq kıim kıip, izetpen ıilip qonaqtardy kútip alatyn qyzdar men shashý shashatyn ájelerdiń, sondaı-aq dombyraǵa qosylyp arnaý óleń aıtatyn aqyndardyń, mıkrofonsyz-aq qozy kósh jerge je­tetin daýysy bar dástúrli ánshilerdiń bolýy jáı ánsheıin kóz aldarqatatyn kórinis emes, basqany qaıtalamaıtyn daraly­ǵy­myz, sharaǵa jıylatyn qonaq ataýlyǵa qurmetimiz.  Osy kún­deri elordada ótip jatqan Dú­nıe­júzi qazaqtarynyń IV quryltaıy aıasynda da sol ejelgi salt-dás­túrden, ádet-ǵuryptan jańyl­maı, delegasııa quramyndaǵy bar qazaqtyń  basyn qosatyn dástúr­li merekeli mádenı shara uı­ym­dastyryldy. Onyń basy-qasyn­da Prezıdent Ákimshiligi men elorda ákimdigi ókilderi júrdi. Esildiń sol jaǵalaýyndaǵy eń bir kórikti jerde «Atameken» etnomemorıaldyq kesheni bar. Sol keshenniń aýmaǵyna jıyrma shaqty kıiz úı tigildi. Kıiz úıdiń dastarqanyna qazaqtyń dástúrli taǵamdary qoıylyp, qonaqtarǵa qonaǵasy tartyldy. Al osy mezette syrtta konsert ótip jatty. Shetten kelgen qandastarymyz, eń aldymen qazaqtyń syrǵa salý, quda túsip, quıryq-baýyr asatý  sııaqty dástúrin tamashalap bir jasap qaldy. Bul quda túsý dás­túrin shettegi aǵaıyn nazaryna usynýdaǵy maqsat – árbir memlekette turatyn qazaq­tarǵa qazaq­tar­men quda bolý ar­qyly bir-birińe jaqyndaı túsiń­der, qazaq­tyqty saqtaýdyń qa­myn jasap júrińder degen oıdy aıtý dep bilemiz. Ile-shala aıaǵyn endi ǵana apyl-tapyl basýǵa jarap qalǵan kip-kishkentaı botaqan Shuǵyla­nyń tusaýy kesildi.  Sodan keıin sahnaǵa kóterilgen tórt jigit, ıaǵnı Astana qalasy memlekettik fılormonııasynyń óner­paz­dary «Alash týy astynda» atty pat­rıottyq rýhtaǵy jyrdy alma-kezek oqyp, qonaqtardy bir serpiltip tastady. Osy mádenı sharada Astana qalasy memlekettik fı­lor­monııasynyń «Saryar­qa» ult-aspaptar ansambli men «Naz» memlekettik bı ansam­bli­niń óner­pazdary Appaqtyń, Bir­jannyń, Aqan Seriniń, bas­qa da halyq án­derin, son­daı-aq Yqy­las, Qur­manǵazy, Súgir, Táttim­bet kúı­lerin shal­qyta oryndap, «Aq qaz», «Qýanysh», «Shalqy­ma» bılerin myń burala bıledi. Sharanyń sońyn ala qonaqtar «Atameken» etnomemorıaldyq keshenin aralap, elimizdiń túkpir-túkpirine ekskýrsııa jasady.  Aıgúl SEIILOVA.