Jeńdik! Gol! Jankúıerlerge rahmet!

Keshe Astana tórinde Qazaqstan quramasy Ázirbaıjan komandasyn qabyldap, 2012 jylǵy Eýropa chempıonatynyń irikteý týrnırindegi alǵashqy jeńisine jetti. Esep – 2:1. Osy kezge deıin Eýropa chempıonatynyń irikteý týrnırine ekinshi ret qatysyp, sonyń ekeýinde jeńisti toılaǵan ulttyq qurama úshin keshegi Ázirbaıjanmen bolǵan jıyrmasynshy oıyn jeńisti kúnderimizdiń jalǵasy bolsa degimiz keledi. Búgin Qostanaıda ótetin Patrıottar forýmynyń aldynda qostanaılyq teńbil dop sheberi Sergeı Grıdın búkil qazaqstan­dyqtarǵa tamasha qýanysh syı­lady. «Tobyl» komandasynyń quramynda sheber oıynymen kópke tanylǵan jas shabýylshy elimizdiń qurama komandasynda alǵash ret óner kórsetip, al­ǵash­qy oıynynda... eki birdeı gol soqty. Mundaı jaǵdaı fýtbolda sırek kezdesedi. Ádette qura­ma komandadaǵy alǵashqy oıyn­da asyp-saspaıtyn adam az. Ondaıda ádettegi júrisinen jańy­lyp, óz komandasyndaǵy oıyn órneginen de aıyrylyp qalyp jatatyndar jetedi. Al Sergeı «As­tana-Arenadaǵy» tuńǵysh match­ta-aq kánigi sheberlerdeı qımyldady, komandaǵa tabıǵı túrde kirigip ketkendeı áser qaldyrdy.  Osy kezdesýde táji­rı­beli oıynshylarmen birge soń­ǵy kezde jasyl alańda kóp­shiliktiń kózine túsip júrgen jas oıynshylar da óner kór­setti. Sonyń biri jańaǵy aıtqan Sergeı Grıdın bolsa, onymen janyn berip, oıynda búkil kúsh-qaıratyn jumsaǵan Ulan Qo­nys­baev, Qaırat Nurdáýletov sııaq­ty oıynshylar. Al qura­ma­ǵa Bernd Shtork kezinde kópten beri alynbaı, «Aqtóbeniń» na­mysyn qorǵap júrgen Samat Symaqov, Marat Haırýllın sekildi tájirıbeli oıynshy­lar­dyń orny bólek, árıne. Bul matchta jaraqatyna baılanysty qaqpashy Davıd Lorııa men jar­tylaı qorǵaýshy Andreı Karpovıch oınamady. Kapıtannyń jeı­desin kıgen Nurbol Jumas­qalıev tipti quramaǵa shaqy­ryl­mady. Quramanyń jańa bapkeri Mıroslav Beranektiń aldaǵy ýaqytta Nurboldaı basqa da tájirıbeli oıynshylardy komanda sapyna qosatynyna senemiz. Al keshegi oıynda dýbl jasaǵan Sergeı Grıdınge negizgi quramǵa qosyp, ózin kórsetýge múmkindik bergenin Qazaqstan quramasyna jetekshilik tizginin jańa qolǵa alyp jatqan cheh jattyqtyrýshysy Mıroslav Be­ranektiń kóziniń qyraǵyly­ǵy­nyń belgisi dep sengimiz keledi. Qazaqstan komandasyna Výgar Nadırov soqqan alǵashqy gol tu­tastaı qorǵaýshy Iýrıı Logvı­nenkonyń kinási deýge bolady. Aıtqandaı, Ázirbaıjan koman­da­synyń bapkeri Bertı Fogts oıyn­shylardy almas­tyrý­da óte sátti sheshim qabyldady. Sol goldyń avtory Výgar Nadırov bizdiń qaq­paǵa dop soǵardan eki mı­nótteı ǵana buryn Djavıd Gýseınovti al­mastyrǵan bolatyn. Osy oıyn­da Mıroslav Beranek te oıyn­shy­lardy sátti almastyra bildi. Ol ekinshi taımda qurama sa­pyna kópten beri qosylmaı, alańda óziniń oıy­nyn taba almaı júrgen Sergeı Osta­pen­­kony Sergeı Hıj­­nı­chen­­­­ko­men, Iýrıı Log­vı­nenkony Mıhaıl Rojkovpen al­mastyrdy. Al Marat Haırýllındi Aleksandr Kırovpen almas­tyrǵany bizge tú­siniksizdeý bolyp kórindi. Osy oıynda Sergeı Grı­dınniń ekinshi go­lyna áde­mi pas bergen Marat oıynyn jalǵastyra bergen­de bizdiń sha­býylshylar esepti taǵy eseleı túser me degen oıymyz bolǵany jasyryn emes. Degenmen, oıyn bizdiń paıda­myzǵa sheshildi. Eń bastysy osy. Stadıonda qura­ma­ǵa bolysyp, «Alǵa, qazaqtar!», «Qazaqstan!» dep 94 mınót boıy urandatqan jankú­ıer­lerdiń qýa­ny­shynda shek joq. Bul jaǵdaı basqaǵa bolmasa da bizge túsinikti nárse. О́ıtkeni, Qa­zaqstan qura­masy ÝEFA-ǵa 2002 jyly kirgenimen, 2006 jyldan, ıaǵnı Eýropa chem­pıo­naty­nyń irikteý týrnırine qatys­qan kezden beri úshinshi jeńisine jetip otyr. Alǵashqy jeńisti biz 2007 jyly Almatyda Serbııany 2:1 esebimen utyp, toı­laǵan bola­tynbyz. Al ekinshi je­ńi­simizge sol jyly Armenııany syrt alań­da 1:0 esebimen jeń­genimizde jetkenimiz esimizde. Biz oıynnan keıin osy re­por­tajdy jazyp úl­gerý úshin redak­sııaǵa asyqtyq ta, matchtan soń­ǵy baspasóz más­lıhatyna qatysa almadyq. Stadıonnan shyqqan bette birer aýyz tildesken jankúıer – ká­sipker Serikbek Boranbaev oıynnan alǵan áserin bylaısha bólisti: «Ázir­baıjan ko­mandasynyń munyń aldynda Túrkııa quramasyn óz alańynda jeńgenin bilgendikten osy oıyn­­ǵa alań kóńilmen kelgenim ras edi. Shynyn aıtqanda, qonaq­tar­dan munan áldeqaıda sheber oıyn kútken bolatyn­myn. Ázir­baıjan­dyqtardan ma­ǵan 22-shi nómirli Afran Izmaılov qatty unady. Tehnıkalyq turǵydan óte saýat­ty. Alańdy jaqsy kó­re biledi. О́z fýtbol­shylary­myz­dyń arasynan Sergeı Osta­penkonyń, Ulan Qo­nys­baevtyń, Kazbek Geterıevtiń janyn sa­lyp oınaǵany kózge uryp tur­dy. Sonymen birge qor­ǵanys shebindegi selkeýlikter áli de jan aýyrtady. Qalaı degende de Qazaqstan koman­da­synyń oıyn órnegi Shtorktyń tusyndaǵydan ilgeri. Jańa bap­kerdiń jańa oıyn­shylardy, jas oıynshy­lar­dy quramaǵa tar­tý talaby da quptarlyq. Fýt­bol­shy­larymyz psıhologııalyq tur­ǵydan áli de shyńdala tússe deımin. Jeńisi­miz qutty bol­syn!». Biz de osyny aıtamyz. Je­ńisti kúnderde júzdesýge jaz­syn. Aıtpaqshy, bizdiń qurama­nyń osy jeńisine shyn júre­gi­men Reseıdegi fýtbol jan­kúıer­leri de qýanyp jatqany kóńil ósiredi. Matchtan keıin ınternet saıttardy aqtaryp otyr­ǵany­myz­da, óziniń atyn atamasa da Qazaq­stannan Reseıge kóship ketken bir jankúıer bylaı dep ja­zypty: «Nıjnıı Novgorodta arab­­tyń bir tele­ar­nasynan match­­ty qarap otyr­myn. Birneshe jyl ishinde qu­ra­ma jańarty­lypty. Ma­ǵan una­dy, shabýylǵa batyl shy­ǵyp júr. Grıdın tań­ǵal­dyr­dy. Ony endi Reseı premer-lıgasynda kórsem deımin. Jerlester, je­ńis­terińiz qutty bol­syn!». Biz­diń buǵan alyp-qosarymyz joq. «Jaqsy sóz – jarym yrys» deıdi. PS: Osy kúni Lıhtenshteın men Lıtva quramalarynyń kezdesýine tórt qazaqstandyq tóreshi qazylyq jasady. Bas tóreshi Artem Kýchın (Qa­ra­ǵan­dy), qaptalda Evgenıı Belskıı (Taraz), Rústem Súıinov (Pa­v­lodar), tórtinshi tóreshi qosta­naı­lyq Anatolıı Vıshnıchenko boldy. Sýretterdi túsirgen Orynbaı Balmurat. Dastan KENJALIN.