Rýhanı úsh tirektiń merekesi

Qostanaıda keshe aq jaýyn quıyp turdy. Bul astyqty óńir­degi dıqandardyń kópten kútken úmiti edi. Respýb­lı­ka­lyq IV patrıottar forýmy­nyń bastalýy da tabıǵattyń osyndaı syıyna týra keldi. Qazaqstan Respýblıkasy ger­biniń avtor­lary Shota Ýá­lıhanov pen Jandarbek Máli­bekov Memlekettik rámizder kúnine oraı­las­tyrylǵan fo­rým­­nyń basty qonaqtary bol­dy. «Qazaqstan alǵa, bıikke samǵa!» «Meniń Otanym – Qa­zaqstan!» dep urandatyp tur­ǵan jastardyń aldynda ataq­ty sáýletshi Shota Ýálıhanov sóz sóıledi. – Men qýanyshtan tolqyp tur­myn. Ahmet Baıtur­sy­nov­tyń eskertkishin tanymal mú­sin­shi, mar­qum Tólegen Dos­ma­ǵanbetov ekeýmiz jasaǵan edik. Bul Qazaq­stan­daǵy óte sátti shyqqan óner tý­yn­dylarynyń biri. Qazaq­stan­nyń, qazaq hal­qy­nyń táýelsizdigi úshin asa qajyrly jiger jum­sa­ǵan tul­ǵanyń biri – Ahmet Baı­tur­synov. Jastar, Ahań ıdeıa­laryna adal bolyńdar! Sender de elimiz úshin osy Ahań sııaq­ty azamattyq is tyndy­ryń­dar, qo­ǵamǵa qaırat­ker­likpen eńbek si­ńirińder! – dedi Shota aǵamyz. Munan keıin forým dele­gat­ta­ry Jeńis parkindegi máń­gilik otqa, 30-shy jyldardaǵy saıası qýǵyn-súrgin qur­ban­da­ryna, Uly Otan soǵysynda qaza tapqandar jáne ıadrolyq synaqtan zardap shekkenderge arnap qoıylǵan obe­lıskilerge gúl shoqtaryn qoı­dy. Soǵys kezinde Qostanaıǵa kó­shirilgen gospıtalda kóz jumǵan sol­dat­tarǵa, osy oblys orta­ly­ǵy­­nan shyqqan batyrlarǵa qoı­­yl­ǵan belgilerdi aralap, Jasyl jelekke, gúlzarǵa oran­ǵan parkti tamashalady. №1 balalar men jasós­pi­rim­der mektebinde Qazaqstan spor­tynyń jarqyn ókili mar­qum Bekzat Sattarhanovtyń ata-anasy Seı­ilhan jáne Syr­lykúl Sattarhanovtarmen kezdesý bol­dy. Sport sıqyry arbaǵan qaı sport­shy Bekzatty ózine ıdeal tut­paıdy deısiz?!. Al Bekzat boks­taǵy alǵashqy jeńis jolyn Qos­ta­naıda jas­óspirimder ara­synda ótken res­pýblıka chempıo­na­ty­nan bas­taǵan eken. Osy jarysta on alty jasar Bekzat týǵan jeri Túrkistanǵa Qos­tanaıdan chempıon bolyp ora­lypty. Seıilhan aǵanyń osyn­daı derekterden bas­talǵan áńgimesi jas sportshy­larǵa óte tanymdy áser etti. Forým delegattarynyń kór­­kem­sýret galereıasynan, oblys­tyq tarıhı-ólketaný, Y.Al­tyn­sarınniń memorıaldyq mýzeılerinen alǵan áserleri mol boldy. Tarıhı-ólketaný mýzeıinde «Qos­tanaı jastary Altyn kitaby­nyń» tusaýkeseri ótti. Bul tek Qostanaıda qanat qaqqan joba. Tobyl-Torǵaı óńi­rindegi oqý­da, ónerde, eń­bekte, qoǵam­dyq ómirde úzdik jastardyń esi­mi osy «Al­tyn kitapqa» al­tyn árippen ja­zy­lady. Olar­dyń sany búginde júzden asyp ketti. Jaqsyny kórmek úshin. Elimiz ekonomıkasynyń tirekteri­niń biri, ken alyby – «Sokolov-Sary­baı ken óndirý birlestigi» aksıonerlik qoǵamynyń kareri de sol kúni forým qonaqtaryn qabyl­dady. Bıikten qaraǵanda ala­qan­daǵydaı kórinip jatqan kenishte japonııalyq alyp tehnıkalar alys­tan qumyrsqadaı qybyrlap kórinedi. Munda eń­bek etetin jas­tar osy sheteldik tehnıka­lar­dy urshyqtaı úıi­re­di. Adam qo­lymen jasalǵan sol alypqa qa­rap turyp, qandaı jastyń Otan­ǵa, elge, týǵan jerge degen súıis­penshilik sezimi júregin ta­syt­paıdy! Degenmen, basty baılyq biz­diń birligimizde. Memle­keti­miz­diń kók zeńgir keńistikteı kók týy, eltań­basy, ánurany oshaq­tyń úsh buty sııaqty úsh rýhanı tiregimiz ekenin forýmǵa qatys­qan ár jas júrekpen sezindi. Sondyqtan tek forým delegat­tary ǵana emes, ár qa­zaqstandyq olarǵa degen óziniń qurmetin aıalaı bilse bolǵany. Respýb­lı­kalyq IV patrıottar fo­­rýmynyń alǵashqy kúni mol áserimen este qalary anyq. Altaı men Atyraý, Arqa men Syr, Alataý arasynan kelgen jastar Tobyl óńiriniń tamyljyǵan ta­bı­ǵatyn da, baılyǵyn da j­a­qy­nyraq bildi, taǵylymdy ta­rıhyna tereńirek úńildi. Adam­darynyń peıiline máz boldy. Tanyǵan saı­yn olardyń baıtaq elimizdiń bir pushpaǵy Qos­tanaıǵa degen qur­met sezimi oıanary haq. Jaqsy kór­genin, qurmettegenin eshkim ja­man­dyqqa qımaıdy, qor­ǵaı­dy. Forým delegattarynyń biri muny patrıotızm dep tú­sindirdi. Forým búgin jalǵasady. Názıra JÁRIMBETOVA, Qostanaı.