Bıyl onynshy jyl qatarynan ótkizilip otyrǵan baıqaýǵa qalamyzdaǵy 8 oqý ornynan 10 boıjetken qatysty. Saıys bes kezeńnen turdy. Úsh saǵatqa sozylǵan synaqta qyzdar teatrlandyrylǵan kórinister kórsetip, án aıtyp, bı de bıledi. Baıqaý barysynda arýlardyń qazaq qyzyna tán náziktik, ınabattylyq minezderimen qatar, Alash ordasynyń 100 jyldyq mereıtoıyn halyq arasynda nasıhattaý úshin qyzdardyń tarıhty, ádebıetti qanshalyqty biletindigi de synǵa alyndy.
Saıys qorytyndysy boıynsha, bas júldeni Quqyq jáne bıznes kolledjinen Samal Basyqaraeva jeńip aldy. Birinshi orynǵa Semeı qarjy ekonomıka kolledjinen Shahrızada Serikova, ekinshi orynǵa Semeı medısına ýnıversıtetinen Botagóz Qylyshbekova, úshinshi orynǵa Shákárim ýnıversıtetinen Ásem Ashatovalar shyqty. Barlyq jeńimpazdar men júldegerler baǵaly syılyqtarmen jáne dıplomdarmen marapattaldy.
Raýshan NUǴMANBEKOVA
Semeı
