Keshe Qazaqstan Respýblıkasynyń Syrtqy ister mınıstri Erjan Qazyhanov elimizde ótip jatqan 7-shi Búkilálemdik Islam ekonomıkalyq forýmyna kelgen Djıbýtı Respýblıkasynyń Syrtqy ister mınıstri Mahmýd Alı Iýsýfpen jáne Brazılııa Federatıvtik Respýblıkasy Syrtqy baılanystar mınıstriniń orynbasary Marııa Edıleýza Fontonello Reıspen ekijaqty kezdesýler ótkizdi.
Aldymen Afrıkadan kelgen áriptesi Mahmýd Iýsýfpen kezdesken Qazaqstan syrtqy saıasat vedomstvosynyń basshysy áńgime barysynda elimiz táýelsizdiginiń 20 jyldyǵynda jáne Qazaqstannyń IKU SIM keńesindegi tóraǵalyǵy qarsańynda «Islamdyq Davostyń» ótýiniń ózektiligine toqtalyp, oǵan qatynasýshylardyń qataryna qarap, Qazaqstanmen ekonomıkalyq yntymaqtastyqty damytýǵa degen yqylastyń qanshalyqty joǵary ekenin ańdaýǵa bolatynyna toqtaldy.
Kezdesý barysynda Erjan Qazyhanov pen Mahmýd Iýsýf Qazaqstan men Djıbýtı arasynda tıimdi baılanystar jáne ıslam álemi qaýymdastyǵynyń tolyqqandy isker músheleri retinde ózara tıimdi yntymaqtastyq ornatýǵa qyzyǵýshylyqtaryn bildirdi. Taraptar yqpaldastyqty damytýda, atap aıtqanda, aýylsharýashylyq jáne kólik-tasymal salalary boıynsha qarym-qatynastardy jolǵa qoıýdyń mańyzdylyǵyna mán berdi.
Qazaqstanǵa Djıbýtı Prezıdenti Ismaıl Omar Gelle bastaǵan delegasııanyń sapary eki jaqty baılanystardyń keńeıýine qajetti serpilis beretini anyq, dep atap ótti mınıstrler jáne eki el bir-biriniń ekonomıkalyq áleýetin baǵalaý maqsatynda isker toptarmen almasyp, ózara saparlar ótkizýiniń qajettigin atady.
Sondaı-aq, syrtqy saıasat vedomstvolarynyń basshylary qazirgi tańdaǵy halyqaralyq jáne aımaqtyq ózekti máseleler boıynsha pikir almasty. Taıaý Shyǵys pen Soltústik Afrıkadaǵy jaǵdaılarǵa toqtala otyryp, E.Qazyhanov Qazaqstan IKU tóraǵasy retinde arab elderine olardyń halyqaralyq jáne aımaqtyq qaýipsizdikti turaqtandyrý men nyǵaıtý jolynda qolushyn beretinin atap ótti.
Afrıkalyq áriptesimen kezdesýden keıin Qazaqstan syrtqy saıasat vedomstvosynyń basshysy Brazılııa Federatıvtik Respýblıkasy Syrtqy baılanystar mınıstriniń orynbasary Marııa Edıleýza Fontonello Reıspen kezdesti. Onyń barysynda áńgimelesýshi taraptar Astana men Brazılıa arasynda joǵary deńgeıde qol jetkizilgen kelisimderdiń júzege asý barysyn talqyǵa saldy.
Qazaqstan men Brazılııa arasyndaǵy taýar aınalymynyń eleýli qarqyny barlyǵyna toqtalǵan dıplomattar Saýda-ekonomıkalyq yntymaqtastyq jónindegi úkimetaralyq komıtettiń qurylýy eki eldiń kásipkerlerine qajetti iskerlik múmkindikter jónindegi aqparat alyp turýyna aıtarlyqtaı yqpal jasaıtynyn aıtyp ótti.
Yntymaqtastyqtyń bolashaǵy zor baǵyttaryna toqtalǵan qazaqstandyq mınıstr brazılııalyq kapıtaldyń Qazaqstan ekonomıkasynyń shıkizattyq emes sektorynda belsendi aralasýyna qyzyǵýshylyǵyn bildirip, aýylsharýashylyq, avıasııalyq qurylys jáne kosmos salalaryndaǵy ózara tıimdi yntymaqtastyq bolashaǵy zor ekenin erekshe atap ótti. Sondaı-aq, E.Qazyhanov Qazaqstan men Brazılııa álemdegi túrli etnostar men konfessııalar arasyndaǵy teń dárejeli qarym-qatynasty saqtap otyrǵan az eldiń qataryna kiretinin ataı otyryp, О́rkenıetter alıansynyń jáne Álemdik jáne dástúrli dinder kóshbasshylary sezderiniń ortaq maqsattaryna qol jetkizýge barynsha kúsh salynatynyn aıtty.
Kezdesýde elimizdiń IKU SIM Keńesiniń tóraǵasy retinde Brazılııanyń IKU-ǵa baqylaýshy mártebesin alýǵa usynǵan ótinishin qoldaýǵa daıyn ekendigi de málim etildi.
Anar TО́LEÝHANQYZY.