Yntymaqtastyq arnalary keń

Memleket basshysy Nursultan Nazarbaev jetinshi Dúnıejúzilik Islam ekonomıkalyq forýmy aıasynda Islam Damý bankiniń Prezıdenti Ahmad Mohammed Álı Ál-Madanımen kezdesti, dep habarlady Qazaqstan Respýblıkasy Prezıdentiniń baspasóz qyzmeti. Kezdesý kezinde eki jaqty is-qımyl máseleleri, sondaı-aq jetinshi Dúnıejúzilik Islam eko­no­mıkalyq forýmynyń kún tártibi talqylandy. – Men yntymaqtastyqqa jáne bizde ıslamdyq qarjylandyrýdy damytýǵa sińirgen zor eńbegińiz úshin sizdi I dárejeli «Dostyq» or­denimen marapattaý týraly Jar­lyqqa qol qoıdym. Ynty­maq­tastyqtyń odan ári damı beretinine senim bildiremin. Biz birinshi ret kezdesip otyrǵan joq­pyz, degenmen, bul – erekshe kezdesý. Bizdiń elimizde ótip otyr­ǵan ekonomıkalyq forým bizdiń ıslam elderimen yntymaqtasty­ǵy­myzǵa yqpal etedi dep senemin. Biz IDB-nyń óz elimizdegi qyz­me­ti­ne úlken mán beremiz. Biz Qa­zaqstanda aımaqtyq ıslam qar­jy­landyrý ortalyǵyn qa­lyp­­tas­tyrý úshin jumys isteýdemiz. Biz qazirdiń ózinde eki bankti ash­tyq, – dedi Memleket basshysy. – Joǵary mártebeli, men úshin jáne bizdiń bank úshin osyndaı joǵary nagrada alý –  úlken qurmet. Bul Qazaqstanmen qa­rym-qatynasymyzdy tereńdetýge umtylýda bizdiń qyzmetkerleri­miz­ge úlken kúsh-jiger beredi, – dedi A.Álı. – Eń aldymen, Islam Damý bankiniń delegasııasy atynan Prezıdentke, Úkimet pen Qazaq­stan halqyna jetinshi Dúnıe­jú­zilik Islam ekonomıkalyq forý­myn ótkizgeni úshin shyn júrek­ten alǵysymdy aıtamyn. Biz Nursultan Nazarbaevtyń sózinen jáne Prezıdenttiń kókeıkesti taqyryptar boıynsha aıtqan qun­dy usynystarynan áser al­dyq. Men osy forýmda qabyl­danǵan sheshimder men usy­nys­tar, sonyń ishinde Qazaqstan Pre­zıdenti aıtqan usynystar Qazaqstan men IKU-ǵa múshe ózge elderdiń arasyndaǵy yntymaq­tas­tyqty keńeıtýge qyzmet etedi dep senemin. Sonymen birge, biz kezdesý kezinde Astanada aldaǵy ýaqytta ótetin Islam Konferen­sııasy Uıymyna múshe elder Syrtqy ister mınıstrleriniń ke­ńe­­sin talqyladyq. Bul da Qa­zaqstan men IDB-ǵa múshe elder­diń arasyndaǵy qarym-qaty­nastardy keńeıte túsýge taǵy bir múmkindik týǵyzady. Biz Prezıdent Nursultan Nazarbaevtyń basshylyǵymen Qazaqstan men IDB arasyndaǵy ekonomıkalyq, saýda jáne ınvestısııalyq ózara qarym-qatynastar nyǵaıatynyna senemiz. Bul forýmǵa IKU men ózge elderdiń kásipkerleri qatysýda. Olar qazaqstandyq áriptesterimen tyǵyz qarym-qatynastar ornatatynyna senimdimin, – dedi kezdesýden keıin Islam Damý bankiniń prezıdenti A.Álı.