Jumyspen qamtý jáne qoldaý

Elbasynyń bıylǵy Jol­daýyn­da jumyspen qamtýdyń jańa stra­tegııasy belgilenip, «Jumys­pen qamtý – 2020» baǵdarla­masyn árbir qazaqstandyqtardyń otbasyna jetkizý kózdelse, osy tapsyrma búginde keńinen júzege asyryla bastady. Ile aýdanynda ótken jıynda máseleniń máni jan-jaqty aıqyndalyp, baǵdar­la­manyń tusaýy kesildi. Baǵdar­lamanyń barlyq maqsat-mindet­te­rin belgilegen basqosý jumys­pen qamtýdyń jańa júıesin taldaýmen, túsindirýmen jalǵasyp, kópshilikten qoldaý tapty. Bıyl Jetisý óńi­rine «Ju­myspen qamtý-2020» baǵ­darlamasyn júzege asyrýǵa 1 mlrd. 176 mln. teńge bólingen. Atalǵan qarjy úsh negizgi baǵyt boıynsha ıgerilse, birinshi baǵyt­ta 446 adamdy kásiptik jáne qaı­ta daıarlaý, biliktiligin arttyrý josparlanǵan. Sondaı-aq, 228 adamnyń eńbekaqysyn sýbsıdııalaý kózdelgen. Al, ekinshi baǵyt­ta jeke kásibin ashatyn azamat­tarǵa mıkronesıeler berilmekshi. Oǵan 126,3 mln. teńge qarasty­rylsa, nesıe berýdi «Jetisý» áleý­mettik-kásipkerlik korpora­sııasy júzege asyratyn boldy. Búgingi tańda «Jetisý» áleý­met­tik-kásipkerlik korporasııasy nesıelik mıkroqarjy berýdi uıym­dastyrýshy uıym retinde tirkelgen. Halyqty jumyspen qamtý men qoldaýǵa baǵyttalǵan baǵdarlama aıasynda qarjy berý atalǵan mekeme arqyly tolyq júzege asyrylmaqshy. Nesıe berý uıymy Taldyqorǵan óńirinde júıelense, ózge aımaqtarda fılıal ashý qolǵa alynýda. Al, úshinshi baǵyt boıynsha ha­lyqty áleýmettik jaǵynan qol­daý maqsatynda bir aýdannan ekinshi aýdanǵa nemese bir aýyl­dan ekinshi aýylǵa kóshirý máse­lesi qoldanylatyn boldy. Áleý­mettik jaǵynan jetkiliksiz qamtylǵandarǵa arnaıy baspana salý da josparda bar. О́ńirde osyndaı 6 ekonomıkalyq damý ortalyqtary belgilenip, alǵash­qy úılerdiń qurylysyn bıyl bastaý kún tártibine qoıylǵan. Eńbek jáne halyqty áleý­mettik qorǵaý mınıstrliginiń jaýap­ty hatshysy Tamara Dúıse­nova oblysta 150 otbasy osyn­daı talappen kóshiriledi dep boljaıdy. Sondaı-aq 16 aýdan men 3 qalada jumyspen qamtý ortalyqtaryn ashýǵa respýb­lıka­lyq bıýdjetten 230 mln. teńge jáne 221 shtattyq birlik bólinetinin jetkizdi. Baǵdarlama shildeniń 1-nen bastaldy. Bıyl osyndaı júıe­men óńir­de 6 myń adam eńbek­pen qamtylady dep kútilýde. Almaty oblysy.