Jolaýshylarǵa qyzmet kórsetý salalyq standartpen belgilengen

Qazirgi tańda elimizdiń kóliktik baqylaý organdary temirjoldaǵy jeke menshik tasymaldaý kompanııalarynyń qaýipsizdik talaptaryn muqııat saqtaýyna jáne kólikke servıstik qyzmet kórsetý sapasyna tekserý júrgizýdi josparlaýda. Onyń ishinde jolaýshylar vagondaryn jóndeý isine de nazar aýdarylmaq. Osyǵan oraı temir jol qozǵalysy qaýipsizdigin qamtamasyz etip, kemshilikterdiń aldyn alýǵa baǵyttalǵan is-sharalar aılyǵy bastaldy. Atalǵan máselege baılanysty «Jolaýshylar tasymaly» AQ «Soltústik» jolaýshylar tasymaly jónindegi aımaqtyq fılıalynyń dırektory Shámil QOJABEKOVPEN tildesken edi. – Shámil Kımuly, ózińiz basqaryp otyrǵan «Soltústik» jolaýshylar tasymaly jónindegi aımaqtyq fılıaly qaı óńirlerge qyzmet kórsetedi? – «Soltústik» jolaýshylar tasymaly jónin­degi aımaqtyq fılıaly Astana, Qaraǵandy (sonyń ishinde Balqash), Pavlodar jáne Qostanaı oblys­taryndaǵy tórt telimde qurastyrylǵan jolaýshy­lar poıyzdarynyń 20 baǵytyna qyzmet kórsetedi. Bizdiń fılıaldyń qurylymyndaǵy tirkeme vagondar Qazaqstan ishinde, sondaı-aq memleketaralyq baǵyttarǵa qatynaıdy. Máselen Astana – Varshava, Balqash – Máskeý, Balqash – Novosıbırsk jáne jazǵy maýsymda Astana – Ekaterınbýrg, Astana – Novosıbırsk, Astana – Omby baǵyttaryna. – Sońǵy jyldary jolaýshylarǵa servıstik qyzmet kórsetýde qandaı jańa bastamalar bar? – Búgingi tańda jolaýshylar poıyzdarynda jo­laýshylarǵa qyzmet kórsetý talaby salalyq standartpen belgilengen. Osyǵan oraı servıstik qyzmetti jaqsartý jónindegi jumystar atqarylyp jatyr. Fılıal qurylymyndaǵy 5 jolaýshylar poıy­zy vagon-meıramhanamen qamtylǵan. 2010 jyldan bastap Astana – Máskeý baǵytyndaǵy №71/72 jolaýshylar poıyzyn jaılylyǵy joǵary deń­geıli poıyz mártebesine keltirý jumystary atqa­rylýda. – Jolserikterdi iriktep tańdaý máselesinde qandaı tájirıbelerińiz bar? – Bizde eńbek etetin jolserikterdiń ortasha statıstıkalyq jasy – 30-45 jas. Olardyń orta-arnaýly nemese joǵary bilimderi bar. Jolserikter mindetti oqý kýrstarynan ótedi jáne olardyń árbiriniń daıyndyq kýrsyn aıaqtaý týraly sertıfıkattary nemese kýálikteri bar. – Jolaýshylarǵa servıstik qyzmet kórse­týde sizderde qandaı problemaly jaılar bar? Ony túzetýdiń qandaı joldaryn usynasyz? – Servıstik qyzmettiń eń úlken problemasy – búgingi kúnge saı jańa jolaýshylar vagondarynyń bolmaýy. Osyǵan oraı Astanada jolaýshylar vagonyn qurastyrý zaýytyn iske qosýdy jedeldetý qajet. Al qazirgi sát úshin Tver vagon qurylys zaýytynan 22 jolaýshylar vagonyn satyp alý – quptarlyq qadam. Bul Astana men Atyraý arasyndaǵy qatynasty damytýǵa múmkindik týǵyzady. Bul vagondar sońǵy tehnıkalyq jáne servıstik talaptarǵa saı. Sonyń ishinde jeke kótermesimen múgedekterge arnalǵan kýpe de bar. Qazirgi kezde jolaýshylarǵa servıstik qyzmet kórsetýde júrdek jolaýshylar poıyzdarynyń máselesin sheshý mańyzdy bolyp tur. – Jolaýshylar kóbine jolserikterdiń jolaý­shylardy «bıletsiz» ornalastyratyndyǵyna shaǵym aıtyp jatady. Ony qalaı joıýǵa bolady? – Bul jaǵdaıda, Qazaqstan Respýblıkasynyń temir jol kóligimen jolaýshylardy, júkti jáne aýyr júkti tasymaldaý erejesin buzǵan poıyz brıgadasynyń qyzmetkerlerine jumystan bosatýǵa deıin aparatyn tártiptik sharanyń eń qatań túrle­rin qoldaný Alaıda, quqyqtyq baza jolaýshylarǵa qyzmet kórsetý salasynda bir ret jibergen tártip buzýshylyq úshin eńbek shartyn buzýdy qarastyr­maıdy. Sondyqtan tártipke shaqyrý sharalaryn deńgeıimen qoldanýǵa týra keledi. Jolaýshylar poıyzdaryn tekserýdi uıymdasty­rýdyń ıkemdi kestesi engizilgen. Inspektorlar arqyly jolaýshylar poıyzdaryn tekserýdiń bekitilgen kestesinen basqa, keshendi komıssııalardyń kenetten tekserý jáne jelige shyǵý ádisteri de qoldanylady. Osyǵan uqsas merzimdi salystyrǵanda jolaýshylardyń shaǵymdaný sany edáýir azaıdy. Jolaýshylar kóbinese vagondardyń tozyǵy jetkendigine shaǵymdanady. – Qazir sizderdiń kásiporyndaryńyzda barlyq jolserikter biryńǵaı kıim úlgisimen qamtylǵan ba? – Shynynda, osy jylǵa deıin jolserikterdi kıim­men qamtýda kemshilikter bolǵan edi. Osy ýaqytta ulttyq oıý-órnekti qosyp, biryńǵaı dızaın­men kıim tigýge shart jasastyq. Bir-eki jyldyń ishinde jaǵdaı tolyq túzeledi. – Áńgimeńizge rahmet. Áńgimelesken: Ábdirahman QYDYRBEK.