• 15 Maýsym, 2011

Taǵy bir tamasha sáýlet týyndysy

433 ret

kórsetildi

2 mın

oqý úshin

Egemen Qazaqstan

Táýelsizdik jáne Astana – tel uǵym. Elimiz erkindik alyp, táýelsizdik tolqynynda táı-táı basqan sonaý bir óliara kezeńde Tuńǵysh Prezıdentimiz Nursultan Nazarbaev ýaqyt tamyrshysyndaı bolashaǵymyzdyń baıandy balamasyn tap basyp, Qazaqstannyń jańa elordasy – Astana qalasyn salý jónindegi ǵasyrlyq jobasyn qolǵa alǵan bolatyn. Sondyqtan el Táýelsizdiginiń 20 jyldyq mereıli merekesi toılanatyn aıtýly kúnge Astana qalasy da tolaıym tartýlarmen, saltanatyn jarastyratyn jańa sáýlet óneriniń týyndylarymen kelmek. Táýelsizdik merekesiniń 20 jyldyǵy qarsańynda Astanada boı kóteretin tamasha sáýlet týyndysynyń biri – «Izýmrýdnyı kvartal» ákimshilik kesheni bolmaq. Ortalyq Azııa óńirindegi qalalarda teńdesi joq eń bıik ǵımarattardan turatyn bul keshen Qazaqstan jáne Soltústik Amerıka arhıtektorlarynyń birlesken qoltańbasy bolyp tabylady. Bul ákimshilik keshen 54, 43 jáne 27 qabattardan turatyn 3 bıik ǵımarattan quralǵan. Onyń ishindegi eń záýlim ǵımarattyń jerden bıiktigi 210 metrge jetedi. Sáýlet óneriniń ozyq týyndysy bolatyn bul záýlim ǵımarattyń bir ereksheligi, onyń 32-shi qabatynan bastap aýqymy keńeıe berip, árbir qabattyń kólemi tómengi qabattan aýqymdyraq bolyp, ǵımarattyń eń joǵarǵy qabattary tómengi qabattardan 15 metr aýqymǵa deıin keń jaıylatyn bolady. Sonymen birge keshenniń astyńǵy qabattarynda 2000 kólikke arnalǵan parkıngter bolady. Záýlim ǵımarattyń eń joǵarǵy qabatynda birneshe dámhanalar men meıramhana jumys istep, óz tutynýshylarynyń qus ushatyn bıiktikten qala kórkin tamashalaýyna múmkindik beredi. Qurylys jumystary qyzý qarqynmen júrgizilip jatqan bul kelisti keshen, Astana qalasyndaǵy sáýlet óneriniń taǵy bir tamasha týyndysy el Táýelsizdiginiń 20 jyldyq merekesi qarsańynda paıdalanýǵa berilmek.