Aqtóbedegi atys

Temir aýdanynyń Shubarshy aýylynda oryn alǵan qandy oqı­ǵa oblys halqyna ashyq kún­de naızaǵaı oınaǵandaı áser etti. Belgisiz bireýlerdiń qolynan oqqa ushqan polısııa qyzmet­ker­leriniń qazasy estigen adamnyń janyn túrshiktirdi. Bul oqıǵany árkim ár saqqa jorydy. Osyǵan oraı keshe buǵan naqty túsinik berý maqsatynda elimizdiń IIM shuǵyl túrde brıfıng ótkizdi. Ishki ister mınıstriniń birinshi orynbasary M.Demeýovtiń aı­týynsha, dinı nanymdardy bet­perde tutqan uıymdasqan qyl­mystyq top Aqtóbe oblysynyń Temir aýdanynyń aımaǵynda birneshe jyldan beri áreket etken kórinedi. Olar tipti Shubarshy men Keńqııaq aýyldarynyń ja­ny­nan ótetin qubyrlardan mu­naı urlaýmen aınalysqan eken. Ústimizdegi jyldyń 26 maý­sy­mynda IID qyzmetkerleri oblys­ta arnaıy izdestirý sharalaryn júrgizgende «Mersedes-bens» av­to­kóligin ustaǵan. Kólikti qa­raý kezinde onyń ishinen «PM» tapanshasy, eki sholaq myltyq, oq-dáriler jáne dinı aǵymdaǵy kitaptar, jarylǵyshtardy daı­yndaıtyn zattar tabylǵan. Polısııa qyzmetkerleri us­tal­ǵan kóliktiń júrgizýshisi men jolaýshysynyń kim ekenin tekserý barysynda olardyń budan buryn da urlyq pen qaraq­shy­lyq shabýyl jasap júrgen uı­ym­das­qan qylmystyq toptyń mú­shesi ekenin jáne olardan bas­qa da sybaılastary bar ekenin anyq­tap­ty. Sodan qylmys jasa­ǵan dep tabylǵan kúdikti aza­mat­tardy ustaý úshin 30 maýsym kú­ni polısııa qyzmetkerleri arna­ıy shara ótkizedi. Alaıda kúdik­tiler aıla­syn asyryp, qashyp qutylady. Mine, dál osy kúni Shubarshy aýylynda patrýldik qyzmetine kirisken polısııa jasaǵyna belgisiz bireýler qarýly shabýyl jasaıdy. Qyzmettik kólikti at­qy­laý nátıjesinde patrýldik polıseıler Alpysbaev pen Boranbaev alǵan jaraqattan oqıǵa ornynda kóz jumdy. Dereý qyl­mystyq is qozǵaldy. Patrýldik polıseılerdi ól­tir­gen adamdardy tabý úshin ob­lystyq IID «Arlan» arnaıy ja­saǵynyń bólimshe qyzmetkerleri Qumsaı aýylynyń mańy men Shu­barshy aýylynan 6-7 sha­qy­rym jerdegi qalyń ósken birneshe shaqyrymdyq qamysty tintýge kirisedi. Osy kezde olarǵa qarsy belgisiz bireýler oq jaý­dyrady. Sonyń saldarynan «Ar­lan» qyzmetkeri Joldybaev jáne úsh polısııa qyzmet­keri jaralandy. Budan keıin kúdik­tilerdi ustaý maqsatynda atalǵan jerge IIM «Suńqar», IIM ishki áskeriniń «Búrkit» arnaıy bó­lim­sheleri jáne IIM ishki ás­ke­riniń jedel batalony jiberildi. Jedel izdestirý sharalary­nyń arqasynda 8 shilde kúni po­lı­seı­lerdiń ólimine qatysty kú­d­ikti­lerdiń Keńqııaq aýylyndaǵy bir úıde jasyrynyp jatqany málim bolady. IIM «Suńqar» jáne ishki áskerdiń «Búrkit» ar­naıy bólim­sheleri tobymen atal­ǵan jerge sho­lý jasalady. О́z erik­te­rińmen be­rilińder degenge Mu­naı­shylar kó­shesindegi №2 úı­den polıseılerge qarsy oq aty­lady. Sol jerde atal­ǵan oqtan arnaıy jasaq qyzmetkeri A.Imanbaev qaıtys boldy. Budan soń jedel túrde polısııa qyzmetkerleri jaqyn mańaı­daǵy úıler turǵyndaryn qaýip­siz jerge kóshiredi. О́z erikte­rińmen berilińder degenge taǵy da qarsy oq atyldy deıdi general. Sodan amal joq, eki jaq atysqa kóshedi. 9 shildeniń tańy atady. Sodan keıin ǵana kú­dik­tiler ja­syrynǵan úıdi basyp alý júzege asady. Nátıjesinde qaqtyǵys or­nynan qarýly qar­sylyq kó­r­set­ken 9 kúdiktiniń denesi ta­byl­dy. Onyń jeteýi ta­nyldy, al ekeýiniń kim ekeni an­yqtalýda deı­di M. Demeýov. Úı­diń ishin qaraý kezinde ishki ásker qyz­met­keri S. Qaljanov jaraqat aldy. Sodan barlyǵy 11 adamnan tu­ratyn qylmystyq toptyń qal­ǵan eki múshesi de kóp uzamaı qol­ǵa túsken. Aleksandr TASBOLAT. *** Endi atalmysh jaıǵa oraı bizdiń osy aımaqtaǵy menshikti tilshimiz Satybaldy Sáýirbaı joǵarydaǵy qandy oqı­ǵanyń jergilikti jerde naqty qalaı oryn alǵanyn bilý úshin oblystyq ishki ister departamenti baspasóz qyzmetiniń bas­tyǵy Almat Imanǵa­lı­ev­ke jo­lyǵyp, onyń jaı-jap­sa­ryn egjeı-tegjeıli suraǵan edi. – Almat Eleýsizuly, ha­lyq­tyń janyn túrshiktirgen bul oqıǵa neden bastalyp, qalaı órbidi ózi? – Quqyq qorǵaý organdaryna birneshe jyldar boıy Temir aý­danynyń Shubarshy jáne Keń­qııaq aýyldary tusyndaǵy munaı qubyrynan dinı ıdeıany jamy­lyp, janarmaı urlaýmen aına­lys­qan qylmystyq toptyń bar ekeni aıan boldy. Olardyń basqa da qylmystar jasaǵany anyq­taldy. Qylmyskerlerdi qu­ryq­taý­men oblystyq ishki ister de­partamentiniń qyzmetkerleri aı­nalysty. Ústimizdegi jyldyń 26 maýsymynda UQKB qyzmetker­le­ri shuǵyl habar boıynsha Aq­tóbe qalasynda «Mersedes» av­tokóligin ustap, ony tekserý kezinde «Makarov» markaly pıstoleti, eki sholaq myltyq, kóp­tegen patrondar tárkiledi. Júr­gizýshi men jolaýshyny tergeý kezinde olardyń segiz urlyqqa, bir adam tonaýshylyqqa qatys­ty­lyǵy an­yqtaldy. Olardyń eki qylmys­tyq toppen baılanys­tylyǵy da málim boldy. 30 maýsym kúni UQKB-nyń qyzmet­ker­le­ri qyl­mys jasaǵan eki kúdiktini ustaý sharalaryn júrgizdi. Alaıda, olar izderin jasyryp, boı tasalap úlgerdi. 30 maýsymnan 1 shildege qaraǵan túnde Shubarshy aýylynda Temir aýdandyq ishki ister bóliminiń qyzmetkerleri po­lısııa serjanttary Nurlan Al­pysbaev pen Aıdos Boran­baevqa belgisiz bireýler qaraq­shy­lyq shabýyl jasap, atyp ketken. Olar oq jaraqatynan kóz jumdy. Keıin qylmyskerler min­­gen «Mısýbısı Delıka» av­to­kóligi aýyldyń syrtynan ta­byldy. Osy derekke qatysty QK 96-baby, 2-bólimi boıynsha qyl­mystyq is qozǵaldy. Polısııa qyz­metkerleriniń ólimine qaty­sy bar shubarshylyqtarǵa izdeý jarııalandy. Olar týraly naqty aqparat bergenderge 100 myń dol­lar kóleminde syılyq taǵaı­yn­daldy. Keńqııaq polısııa bóli­mi­ne túsken aqparat boıynsha №18 úıdiń janyndaǵy aǵashtar ara­sy­nan jerdi qazyp jatqan kúdiktilerdi ustaý kezinde álgi adam qarsylyq kórsetken. Polısııa qyzmetkerlerine qaraı po­lı­etılen paketin laqtyryp qa­sha jónelgen er adam jaqyn mańdaǵy «BMV» avtoma­shına­sy­na qaraı jú­girgen. SOBR qyz­met­keri qa­shyp bara jatqanǵa qa­rý qol­dan­ǵan. Qashqyn oń jam­basynan ja­ra­lanyp, avtomashına belgisiz jaq­qa ǵaıyp bo­lyp úlgergen. Ja­raly poselkelik aýrýhanada qaı­tys boldy. Oqıǵa bolǵan jerden «Ij» markaly 16-kalıbrli myl­tyq, 16-bet broshıýra, aqsha sa­lyn­ǵan er adamnyń aıaq kıimi ta­byl­dy. Avtomashına turǵan jerden de 16-kalıbrli ańshy mylty­ǵy alyndy. Tap sol kúni 3 shildede Shu­barshydan 6-7 shaqyrym bola­tyn Qumsaı aýylyna jaqyn jer­degi qalyń qamysty súzip shy­ǵý kezinde belgisiz bireýler ja­qyn­dap qalǵan «Arlan» ar­naý­ly maqsat­taǵy bólimshesiniń qyzmetker­lerine oq atyp, arnaý­ly operasııa kezinde 35 jasar Rýslan Joldy­baev sol jerde qaza tapty. Son­daı-aq, «Arlan­nyń» úsh qyzmet­keri ártúrli ja­raqat aldy. – Qarýly qaraqshylardy us­taýǵa qandaı kúsh qury­lym­dary jumyldyryldy? – Kúdiktilerdi ustaý úshin «Ar­lan», IIM-niń «Suńqar», IIM ishki ister áskerı komıtetiniń «Búr­kit» arnaýly maqsattaǵy bó­limsheleri men oblys ortaly­ǵyn­daǵy №6655 áskerı bóliminiń shuǵyl batalo­ny jiberildi. 8 shildede polısııa qyzmetkerlerin óltirgen kúdik­ti­lerdiń júrgen jerlerin anyqtaýǵa baılanysty shuǵyl sharalardy júrgizý úshin osy kúsh qury­lym­darynyń qyz­met­kerleri Qeńqııaq poselkesindegi úılerdi aralap jú­rip, tekserýge kiristi. Qylmysker­ler ja­sy­rynǵan turǵyn úı an­yq­taldy. Keshki 20 saǵat 45 mınýtta «Neftıanık» kóshesi №2 úıden polısııa qyzmetkerlerine qarsy oq atyldy. Sonyń saldarynan «Suń­qar» arnaýly maqsattaǵy bólim­shesiniń qyzmetkeri, polısııa ma­ıo­ry Aıbolat Imanbaevqa oq tıip, sol jerde mert boldy. Son­daı-aq, Keńqııaq polısııa bóli­miniń avtopatrýl qyzmetkerleri de 50 metr jerden boraǵan oqtyń as­tynda qaldy. Qarýly qaq­ty­ǵys barysynda polısııa ser­jan­ty Turarbek Eshpaǵambetov ja­ra­qat­tanyp, ol dereý jergilikti aýrý­ha­naǵa jetkizildi, qazir oǵan medı­sınalyq kómek kórsetilýde. Kú­diktiler kúsh qurylymdary qyz­metkerleriniń berilý týraly tala­byna oq jaýdyrýmen jaýap berdi. Urys tún ortasyna deıin jal­ǵasty. Sodan keıin qylmys­ker­ler ornalasqan úıdi arnaýly maqsat­taǵy bólimsheler qyzmet­kerleri oqshaýlandyryp, qor­shaý­ǵa aldy. Jaqyn mańdaǵy úı­ler­diń turǵyn­dary qaýipsiz jerlerge kóshirildi. Ertemen qyl­mys­kerler boı tasa­laǵan úıge sha­býyl jasaldy. Ol kúndizgi saǵat 12-de aıaqtaldy. Operasııa bary­synda polısııa qyz­metkerlerine qarsy­lyq kór­setken 9 qyl­mys­kerdiń kó­zi joı­yldy. Onyń 6-ýy buryn iz­des­tirýde júrgen kúdik­ti­ler bo­lyp shyqty. Úıdi qyl­mys­ker­lerden tazartý kezinde ish­ki ister áske­riniń qatardaǵy jaý­yngeri Serjan Qaljanov jaraqat aldy. – Qylmyskerler ozyq úlgi­degi qarýlarmen qarýlanǵan degen ne sóz? – Bul qate pikir, qur qaýeset. Olar kádimgi «Makarov» pıstoletterimen, «Saıga» jáne basqa ańshy myltyqtarymen qarýlanǵan. – Reseıden kómek keldi me? – Joq. Bul baǵyttaǵy barlyq is-qımyl ózimizdiń kúshimizben atqaryldy. – Qeńqııaq, Shubarshy jáne Sorkól aýyldarynda komen­dant­­tyq saǵat ornatyldy degenge ne aıtasyz? – Komendanttyq saǵat orna­tylǵan joq. Turǵyndarǵa ózde­ri­niń qaýipsizdigi úshin jasalyp jat­­qan sharalarǵa túsinistikpen qaraý jetkizildi. Sondaı-aq, bar­lyq beketterde adamdardyń kim ekeni anyqtalyp, avtokólikter tek­serildi. Turǵyndardyń erkin jú­rip turýyna kedergi bolǵan joq. – Endi osymen oqıǵa oryn alǵan jerdegi operasııa aıaq­tal­dy ma? – Polısııa qyzmetkerlerin óltirgen qylmyskerlerdi quryq­taý­ǵa baılanysty operasııa to­lyq aıaqtaldy. Alaıda, shuǵyl ter­geý toby jumysyn jalǵas­ty­rýda. Jal­py, basynda qylmys­ker­ler sa­ny 11 adam degen boljam boldy. Sońǵy operasııa kezinde 9 qanisherdiń kózi joı­yl­dy. Onyń 6-ýy izdeýde júrgen­der. Olarmen kimderdiń baıla­ny­sy bar ekenin anyqtaý ju­mys­tary júrgizilýde. Shyny kerek, bular «qoı terisin jamylǵan qasqyrlar» sııaqty dindi betperde etip, qylmystyq top quryp, urlyqpen, qaraqshylyqpen aına­lysqan qylmyskerler. Áńgimelesken Satybaldy SÁÝIRBAI. Aqtóbe oblysy.