Qazaqtyń aspaly shamy

Iá, qaı jaǵynan alsaq ta, ebin taýyp eńbek etsek halqymyzdyń órkendeý jolyndaǵy úlgi men ónege­si, oıyndaǵy ushqyrlyq, boıyndaǵy talant jetip artylady. Sonyń bir kórinisine Astana kúnin­de kýá boldyq. Osy kezge deıin ózge jurt­tardyń alýan túrli shamdaldaryna tamsanyp, sony tóbemizge de, tórimizge de ilip júretin edik. Dızaınine, ıaǵnı qubyl­ǵan shynysyna, iletin ilgegine – nesin aıta­syz, bárine qarap, mynaý Eýropaniki, anaý Qytaıdiki dep salystyryp, salmaqtap baǵasyna kelgende qaltany basyp, jelkeni qasyp júretinbiz. Al myna shańyraq formasyndaǵy óz shamda­ly­myz­dy kórgen­de ulttyq mádenıettiń bir ádemi jaý­hary kózimizge jylyushyrap, janymyzǵa jylý quıǵan. Jań­ǵyrt­sa, jaqsymyz bar eken-aý degizdi. Ár asy­lymyzdy osylaısha mysqaldap jasap, qajetimizge jarata bersek, ulttyq naqyshtaǵy dúnıelerimiz birte-birte basqanyń jyltyraǵy­nyń ornyn basyp, jetile kelip, ony yǵystyryp shyǵarary sózsiz. Bul ar­qyly tirnektep tapqan teńgemizdi óz qazynamyzda  qaldy­ra­rymyz anyq. «О́ziń óndirmeı ózegiń jal­ǵanbaıdy» degen qanatty sóz osyndaıda týsa kerek. Osy ulttyq naqyshtaǵy dúnıeni jasaǵan azamatpen tildeskenimizde, ol bul isin qazir Qytaı kásiporyndarymen birigip júzege asyryp jatqanyn jetkizdi. Shańyraq úlgisindegi shamdaldar (lıýstra) sheteldik qonaqtardy qabyldaıtyn saltanaty mol ǵımarattardyń kire berisinen bastap, ár bólmesine, qabyrǵalaryna arnap jasalyp jatqanyn alǵa tartty. Sol sekildi kópshilik oryndarǵa da atap aıtqanda, balabaqshalarǵa, mektepterge, joǵary oqý oryndaryna, jeke úılerge de, tórt qubylasy túgel delinetin kottedjderge de yńǵaılastyryp jasap jatqanyna mysaldar keltirip, alýan formalardy kórsetti. Ol azamat – almatylyq kásipker Meıram Qabdyrahman edi. «Men kópten beri Astana kúnine bir tartý tartsam dep júrgen edim. Bul jolǵy dú­nıe­lerimniń bári elorda úshin jasaldy. Paıym­daýymsha, Qazaq elinde qazirshe mundaı ulttyq naqyshtaǵy shamdaldar joq bolýy kerek. Men qasıetti sanalatyn kıiz úıdiń shańyraǵyn negizge ala otyryp, alýan túrdegi shamdaldardy jasap jatyrmyn. О́nim­deri­me suranys az bolyp turǵan joq. Qanattas otyrǵan qyrǵyz baýyrlar: aǵaıyndy elmiz ǵoı, kıiz úıdiń shańyraǵy qazaq-qyrǵyzǵa ortaq, birlesip jumys jasaıyq degen usynystaryn bildirýde. Biraq men bul jumysty óz Otanymda óristetýdi maqul kórip otyrmyn. Demeýshiler óz elimizden de tabylar degen úmittemin», deıdi M.Qabdyrahman. Shynynda, ulttyq jádigerimizdiń negizinde jasalǵan sham ádemi. Formasy ózgeshe. Halyqtyq qalyp aınadaǵydaı aıqyn. Onyń ústine ár shańy­raqqa osy shamdaldan jaryq nury shashylyp tursa, ol oı sanamyzdy sáýlelendirip,  ulttyq rýhymyzdy jańǵyrtyp jatsa, qane. Súleımen MÁMET.