QR Qarýly kúshteriniń 25 jyldyǵynyń qurmetine marafon uıymdastyryldy. Oǵan eki myńnan astam jelaıaq qatysty.
«Buqaralyq sportty damytýǵa baǵyttalǵan mundaı shara endi jyl saıyn ótkiziledi» - deıdi qala ákimi Serik Shápkenov.
10 km, 21 km qashyqtyqqa júgirip, oza shapqandar arnaıy marapattarǵa ıe boldy. Al 7 mamyrda munaıly aımaq turǵyndary Isataı-Mahambet atyndaǵy ortalyq alańǵa jınalyp, Astanadaǵy áskerı paradty tikeleı kórsetilim arqyly tamashalady. «Men qazaqtyń sarbazymyn» atty Atyraý garnızony bólimderi áskerı qyzmetkerleriniń konserti de osy kúnge oraılastyryldy. 8 mamyrda ekinshi dúnıejúzilik soǵysqa qatysqandarǵa jáne 1921 jyly Gýrev qalasynda Keńes Úkimetin ornatý jolynda kúresip qaza tapqandarǵa arnalǵan eskertkishke gúl qoıý rásimi boldy. «Qaharman ult – máńgilik polk» jalpyrespýblıkalyq aksııasyna atyraýlyq maıdangerlerdiń urpaqtary ún qosty. Áskerı orkestrdiń áýenimen soǵysqa qatysqan týystarynyń sýretterin alyp júrgen 700-den astam qala turǵyny Jeńis saıabaǵyndaǵy máńgilik alaýǵa gúl shoqtaryn qoıdy. Qalalyq jastar resýrstyq ortalyǵynyń uıymdastyrýymen saltanatty shara ótip, beıbit kúndi beıneleıtin aq kógershinder kókke ushyryldy.
Jeńis kúni merekesinde soǵysta qaza tapqan jerles jaýyngerlerge arnalǵan máńgilik alaýǵa gúl shoqtaryn qoıý rásimi uıymdastyryldy. Oǵan oblys ákimi Nurlan Noǵaev qatysyp, merekelik lebiz joldady. Otty jyldarda Atyraý oblysynan qan maıdanǵa attanǵan 42 509 jaýyngerdiń 29 222-si ǵana týǵan jerge aman oraldy. Qazir sonyń 42-si ortamyzda. Jeńistiń 72-nshi jylyn qarsylaǵan soǵys ardageri Álibek Túsipálıev: «El bolashaǵy úshin jandaryn qıǵan bozdaqtardyń eńbekteri aqtaldy. Urpaǵymyz táýelsiz, beıbit elde ómir súrip jatyr. Osy tynyshtyq máńgilik bolsyn» - deıdi.
