Úkimet basshysynyń jyl saıynǵy elimiz aımaqtaryn aralap, jaǵdaımen tikeleı tanysýy aldymen Astanamen irgeles óndiristi óńirden bastalýyna qaraǵandylyqtar úlken mán beredi. Otandyq ındýstrııanyń qara shańyraǵy sanalatyn, damýdyń jańa kezeńinde kóshbasshylyq ornyn joǵarylatqan ólkege úmit pen jaýapkershilik júgi asa salmaqty ekeni belgili. Ol abyroıly aqtalyp keledi. Málim sebepterge qaramastan byltyrǵy belgilengen mindetter tyńǵylyqty oryndaldy. Alda odan da aýqymdy ister tur. Jumys saparynda Buqar jyraý aýdanyna arnaıy atbasyn burǵan K.Másimov Botaqara kentinde “100 mektep, 100 aýrýhana” baǵdarlamasy aıasynda shańyraq kótergen jańa emdeý ortalyǵyna soqty. Eki jyl ishinde salynyp, paıdalanýǵa berilgen nysannyń ashylý saltanatyna qatysty. Bir aýysymda 200 syrqatty qabyldaıtyn emhanasy jáne 100 tósektik aýrýhanasy bar atalǵan ortalyq sapaly medısınalyq qyzmet kórsetýge negizdelgenine ishin aralap kórý kezinde kóz jetkizdik. Aımaqta sońǵy ýaqytta joǵary tehnologııalyq kásiporyndar qataryn ulǵaıtý baǵytynda iri ındýstrııalyq-ınnovasııalyq jobalar iske asyrylýda. Jylyna 130 myń jylytý radıatoryn shyǵaratyn “Kaztherm” JShS solardyń biri sanalady. Seriktestik jetekshileri Kárim Qajymqanulyn onyń jumysymen jan-jaqty tanystyryp, qurylys uıymdarynyń úlken suranysyna ıe osynaý ótimdi ónimdi óndirý kólemi ulǵaıa túsetindigin atady. Premer-Mınıstr budan keıin Qaraǵandy qalasynyń “Gúlder” shaǵyn aýdanynda jaqynda esik ashqan “Balaqaı” balabaqshasynyń tárbıeshileri jáne tárbıelenýshilerimen kezdesti. Munda elimizdiń mektepke deıingi mekemelerinde alǵash ret uıymdastyrylǵan oqytýdyń ınnovasııalyq formalary kabıneti jumys isteıdi. Onyń baldyrǵandardyń este saqtaý, esepteý, oqý, jazý daǵdylaryn oıyn arqyly úıretýge, beriktirýge múmkindik beretindigi nazar aýdartty. Sonymen birge taǵy bir erekshelik, árbir búldirshinniń damýy men úlgerimi jaıynda elektrondy derekter banki jasalǵan. Munyń ózi ata-analar balalarynyń bilimi men beıindik qabiletterin ınternet arqyly bilip, baqylaı alyp otyrýlaryna óte yńǵaıly jaǵdaı týǵyzady. Byltyr oblysta “Jol kartasy” baǵdarlamasy boıynsha atqarylǵan ister el ishi tynysyna tyń serpin berdi. Solardyń eleýli bir kórinisi retinde K.Stanıslavskıı atyndaǵy orys drama teatry ǵımaratynyń qaıtadan qulpyryp, jańaryp, ónersúıer qaýymmen tanyǵysyz qalypta qaýyshýyn ataýǵa bolady. Budan elý jyl buryn otaý tikken munda burnaǵy jylǵa deıin S.Seıfýllın atyndaǵy qazaq drama teatry da qońsylas bolyp kelgen edi. Ǵajaıyp jańa ǵımaratqa oryn tebisimen munda óner ordasyn ádemi keskin-kelbetke keltirý qolǵa alynyp, ol qala kórkine aınaldy. Úkimet basshysy Reseı Federasııasynyń Qazaqstan Respýblıkasyndaǵy elshisi Mıhaıl Bocharnıkovpen birge teatr aldynda jınalǵandardyń qýanyshyna ortaqtasyp, ataqty rejısserge ornatylǵan eskertkishke gúl shoqtary qoıyldy. Kórshi eldiń mádenıet salasy ókilderi atynan Teatrlar qaıratkerleri odaǵy tóraǵasynyń birinshi orynbasary, Reseı halyq ártisi Evgenıı Steblov sóz sóılep, orys ónerine, onyń tulǵaly sańylaǵyna degen qazaqstandyqtardyń zor qurmetine alǵys sezimin jetkizdi. Qaraǵandyda jasalyp, shyǵarylýy jolǵa qoıylǵan “Arglabın” dárisi búginde alysqa aıan. Elbasynyń tikeleı qoldaýymen qurylǵan, “Fıtohımııa” halyqaralyq ǵylymı-óndiristik holdıngi men Qaraǵandy farmasevtıkalyq kesheni otandyq biregeı fıtopreparattardy keshendi túrde bıologııalyq belsendi zattardy izdestirýden bastap, dárilik shıkizatty ósirý, olardy óńdep, jańa fıtopreparattardyń daıyn dárilik túrleriniń tájirıbelik-ónerkásiptik mólsherin shyǵarýǵa deıin jetkizý jumystaryn júrgizýde. Premer-Mınıstr osynda bolǵanda bul isterge erekshe zeıin qoıdy. Preparattardy óndirýdiń tolyq sıkly, sonyń ishinde daıyn ónimniń sapasyn baqylaý, bıologııalyq belsendi zattardyń jáne dári-dármektiń standartty úlgileriniń respýblıkalyq banki kórsetildi. Memleket basshysynyń tapsyrmasy boıynsha birinshi jáne ekinshi kezekteri merziminde paıdalanýǵa berilgen farmasevtıkalyq keshenniń endi úshinshi kezegin iske qosý kún tártibinde tur. Ol fıtopreparattardyń sýbstansııalary negizinde tabletkaly jáne túıirshikti dárilik túrlerdi daıyndaýǵa, sondaı-aq, eksportqa baǵyttalǵan otandyq preparattar shyǵarý kólemin arttyrýǵa yqpal etpek. Sondyqtan Úkimet basshysyna atalǵan holdıng pen keshen jetekshileri málim etkendeı, osy qurylystyń mejeli ýaqytta aıaqtalýy úshin qarjynyń jetkilikti bólinýi qajet. Bul usynystyń qoldaý tabatyndyǵy aıtyldy. Buǵan qosa dárilerdi kepildemelik negizde satyp alýǵa “Samuryq-Qazyna” qory tarapynan uzaq merzimge kelisim-shart jasaýǵa yqpal etiletindigi de atap kórsetildi.
Aıqyn NESIPBAI,
Qaraǵandy.
