Fransııa pavılony 1084 sharshy metrdi quraıdy jáne kórmedegi eń úlken pavılondardyń biri. Munda memlekettiń iri kompanııalary – «Peugeot», «Syctom», «Total», «Veolia», «Vicat», «Iter», «ADEME», «Saint-Gobain» ózderiniń bolashaq energııasy taqyrybyndaǵy jetistikterin pash etip, jańa ónimderin kórsetpek. «Bizdiń kórme pavılonymyz eki qabattan turady. Birinshi qabatta Fransııada ınnovasııa men bolashaq tehnologııalar salasynda ozyq sanalatyn kompanııalar ornalassa, ekinshi qabat sımpozıýmdarǵa, debattarǵa, sýret kórmelerine arnalady. Ol bir sátte 200 adamdy qabyldaýǵa qaýqarly. «Peugeot» kompanııasy 1995 jyly álemde eń alǵashqylardyń biri bolyp óziniń elektr kóligin tanystyrǵan edi. Astanada ótetin EKSPO-2017 kórmesinde biz jańa býyn kóligin usynatyn bolamyz. Bul, ásirese, búldirshinder men avto álemin jaqsy kóretinder úshin qyzyq bolatyny sózsiz», dedi P.Loro.
Pavılonnyń ózi «Ekoqala», «Balamaly energııa» jáne «Ekologııalyq kólik» degen taqyryptarǵa bólingen eken. Osy taqyryptardyń birine saı jasalǵan fransýz pavılonynyń birinshi qabatyndaǵy 7 bólik kelýshilerge «jasyl energetıka» salasyndaǵy jańa tehnologııalarmen tanysýǵa múmkindik beredi. Bólikter galereıa arqyly qosylǵan, onda álem órkenıetiniń damýyna úlesterin qosqan Fransııanyń kórnekti qaıratkerleri men ǵalymdarynyń beıneleri qoıylady.
P.Loronyń aıtýynsha, kórme qonaqtary pavılon aýmaǵynda fransýz óner qaıratkerleriniń shyǵarmalaryn – músinshi Mılen Germonnyń týyndysy «Mınıs Akva» kompozısııasyn, sýretshi-ıllıýstrator Iаn Dalonnyń qolynan shyqqan jáne Fransııanyń sımvolyna aınalǵan Marıanna beınesin jáne Fransııanyń eń ádemi jerleriniń fotosýretterin kóre alady. Astana EKSPO-2017 halyqaralyq kórmesi jumys istep turǵan ýaqytta Fransııa eki ulttyq merekesin – 21 maýsymda Fransııa kúnin, 14 shildede Bastılııany alý kúnin atap ótedi. Osyǵan oraı, merekelik is-sharalar uıymdastyrylady.
Fransýzdar 21 maýsymda otyz jyldan astam ýaqyttan beri toılap kele jatqan Mýzyka merekesi aıasynda ózderin barlyq qyrynan kórsetpek. Shara qonaqtary dástúrli sırk nómirleri men kabareni kórip, Fransııanyń ońtústik-batysynyń jáne Bretan mýzykasyn tyńdaıdy. Mýzyka merekesi sheńberinde Qazaq ulttyq óner ýnıversıtetiniń stýdentteri de fransýz tilinde án salady.
Pavılonnyń konferensııa zalynda úsh aı boıy kóptegen semınarlar, sheberlik saǵattar men ǵylymı konferensııalar ótedi. Olarǵa qatysqan qonaqtar bolashaq energııasy salasyndaǵy fransýz ınnovasııalyq tehnologııalary týraly, sondaı-aq, bilim, mádenıet jáne frankofonııa salalaryndaǵy Fransııa men Qazaqstannyń yntymaqtastyǵy týraly kóptegen qyzyqty málimetterge qanyǵady.
Ashat RAIQUL,
«Egemen Qazaqstan»
