Dinı saýatty arttyratyn kitaptar

Islam mádenıeti men bilimin qoldaý qory Qazaqstan musyl­mandary dinı basqarmasyn qajetti dinı kitaptarmen qamta­ma­syz etý jumystary úzdiksiz júrgizip keledi. Búgingi kúnge deıin qor tarapynan barlyǵy 153 000 dana kitap jáne 275 000 kitapsha jaryq kórip, jurtshylyqtyń qolyna tıgen eken. Sonymen qatar, qor basshylyǵy búgingi tańda qoǵamnyń aldynda turǵan rýhanı máseleler, onyń ishinde Islamda jańa aǵymdardyń paıda bolýy, sol aǵymdardy ustanatyndar qatarynyń ósýine tosqaýyl jasaý, jastardyń arasyndaǵy qylmys pen óz-ózine qol jumsaýdyń aldyn alýǵa baǵyttalǵan dinı ónimder shyǵarý jumystaryn júrgizý ústinde. Sondaı rýhanı dúnıelerdiń qatarynda Sh.Ádilbaevanyń «Súnnet saltymyz, Hadıs ǵurpymyz», S.Seıitbekovtiń «Iman negizderi» degen kitaptaryn ataýǵa bolady. Bul qundylyqtardyń árqaısysy qazaq tilinde 35 000 danadan basylyp shyqqan eken. Onyń 25 000 danasy QMDB meshitterine jiberilse, qalǵan 10 000 danasy turǵyndarǵa tegin taratylýda kórinedi. Qor sondaı-aq, halyqtyń dinı saýatyn arttyrý, teris pıǵyldy aǵymdardyń  shyǵý tarıhy jáne onyń qoǵamymyzǵa keri yqpalynyń aldyn alý maqsatynda «Musylman ómirindegi mindetter-qaǵıdattar-minez-qulyq úlgiler», «Bala tárbıesi besikten bastalady», «Musylman sıpaty» jáne «Obıazatelstva ı prınsıpy v jıznı mýsýlmanına» degen kitapshalar ázirlep, bulardyń árqaısysyn 50 000-100 000 danamen shyǵaryp, tegin taratýdy maqsat etipti. «Egemen-aqparat».