Konvensııany ratıfıkasııalaý Qazaqstannyń joǵary bilim júıesin halyqaralyq standarttarǵa jaqyndatý, dıplomdar men biliktilikterdi tanýdyń ashyq, senimdi jáne ádil tetikterin qalyptastyrý jolyndaǵy júıeli saıasatynyń jalǵasy. Tokıo konvensııasyna qosylý joǵary oqý oryndary arasyndaǵy ózara senimdi arttyryp, stýdentter men oqytýshylardyń akademııalyq utqyrlyǵyn keńeıtedi ári Ortalyq Azııa men Azııa-Tynyq muhıty óńirinde yqpaldasqan bilim keńistigin qalyptastyrýǵa jol ashady.
Qazaqstannyń bul sheshimi eldi Ortalyq Azııadaǵy bilim berý habyna aınaldyrý jónindegi strategııalyq maqsatpen tyǵyz baılanysty. Bul basymdyq Memleket basshysy Qasym-Jomart Toqaevtyń «Ortalyq Azııa renessansy: ornyqty damý jáne órkendeý joly» atty maqalasynda aıqyndalǵan. Konvensııany ratıfıkasııalaý ulttyq biliktilik júıesine jáne ony taný tetikterine degen halyqaralyq senimdi kúsheıtedi.
Ǵylym jáne joǵary bilim mınıstri Saıasat Nurbektiń aıtýynsha, bul qadamnyń praktıkalyq máni zor.
«Konvensııa dıplomdar men biliktilikterdi ózara tanýdy jeńildetip, túlekterimizdiń Azııa-Tynyq muhıty óńirindegi bilim berý jáne kásibı múmkindikterge qol jetkizýin keńeıtedi. Sondaı-aq otandyq ýnıversıtetterge sheteldik stýdentterdi tartýǵa yqpal etedi. Bul joǵary bilim júıemizdiń halyqaralyq básekege qabilettiligin arttyryp, eldi tartymdy óńirlik bilim ortalyǵy retinde tanytady», dedi mınıstr.
2011 jyly qabyldanyp, 2018 jyly kúshine engen Tokıo konvensııasy biliktilikterdi tanýdyń óńirlik arhıtektýrasyn jańǵyrtyp, ashyqtyq, sapany qamtamasyz etý, aqparat almasý jáne ádildik qaǵıdattaryn bekitti. Qujat biliktilikterdi baǵalaýda ákimshilik kedergilerge emes, oqý nátıjelerine súıenýdi mindetteıdi.
IýNESKO Qazaqstanmen biliktilikterdi taný salasynda ulttyq áleýetti nyǵaıtý maqsatynda kóp jyldan beri tyǵyz yntymaqtastyqta jumys istep keledi. Bul baǵyttaǵy belsendi qatysý óńirlik dıalogty kúsheıtip, ozyq tájirıbelerdi damytýǵa múmkindik berdi.
Almatydaǵy IýNESKO óńirlik keńsesiniń dırektory Ámir Pırıch Qazaqstandy Ortalyq Azııada Tokıo konvensııasyn ratıfıkasııalaǵan alǵashqy memleket retinde quttyqtady.
«Bul sheshim Qazaqstannyń ınklıýzıvti ári ádil biliktilikterdi taný qaǵıdattaryna, joǵary bilimdegi halyqaralyq standarttarǵa adaldyǵyn kórsetedi jáne eldi óńirlik bilim habyna aınaldyrý strategııasyna eleýli úles qosady», dedi ol.
Qazaqstan ratıfıkasııalyq gramotany IýNESKO-ǵa tapsyrǵannan keıin úsh aı ótken soń Tokıo konvensııasynyń tolyqqandy qatysýshysyna aınalady. Qujatty iske asyrý joǵary bilimdi basqarý júıesin nyǵaıtyp, Ortalyq Azııa men Azııa-Tynyq muhıty óńirinde ózara baılanysqan ári ornyqty bilim keńistigin qalyptastyrýǵa, sondaı-aq Ornyqty damý maqsattarynyń 4-tarmaǵyn júzege asyrýǵa serpin beredi.
Qazaqstan men Pákistan ǵylym jáne bilim salasyndaǵy yntymaqtastyqty keńeıtedi
