Foto: Aqorda
Mınıstr otbasy balanyń boıyna izgilik pen súıispenshilikti darytatyn meken ekenin atap ótti.
«Otbasy – ár adamnyń ómirindegi eń qymbat meken. Adam alǵash ret meıirimdi de, jaýapkershilikti de, qurmet pen qamqorlyqty da óz shańyraǵynda sezinedi. Balanyń boıyna izgilik, eńbekqorlyq, úlkenge qurmet, kishige izet, elge degen súıispenshilik eń aldymen otbasynda darıdy. Sondyqtan halqymyz «Otan otbasynan bastalady» dep beker aıtpaǵan. Shańyraq – qazaq úshin qasıetti uǵym. Ol tek kıiz úıdiń tóbesi ǵana emes, urpaqtyń jalǵasy, áýlettiń amandyǵy, tatýlyq pen berekeniń nyshany. Shańyraǵy bıik, keregesi keń, bosaǵasy berik eldiń bolashaǵy da nyq bolady. Memleket basshysy Qasym-Jomart Toqaev: «Otbasy – halqymyz úshin qasıetti uǵym. Ár adam, eń aldymen, óziniń qasterli shańyraǵynda tulǵa retinde qalyptasady, úlgi-ónege alyp, naǵyz azamatqa tán ıgi qasıetterdi boıyna sińiredi», degen bolatyn. Rasynda, berekeli otbasy – tárbıeli urpaqtyń, al tárbıeli urpaq – myqty memlekettiń negizi», dedi mınıstr.
Aıda Balaeva elimizde otbasy ınstıtýtyn nyǵaıtýǵa, ana men ákeniń mártebesin arttyrýǵa, balalardyń qaýipsiz ári baqytty ortada ósýine erekshe kóńil bólinip kele jatqanyn da aıryqsha atap ótti.
«Bul baǵytta jas otbasylarǵa qoldaý kórsetý, ata-analardyń jaýapkershiligin arttyrý, bala tárbıesi mádenıetin damytý boıynsha júıeli jumystar atqarylyp jatyr. «Ata-analar akademııasy», Otbasyn qoldaý ortalyqtary, Ákeler odaǵy men Analar odaǵy sııaqty bastamalar qoǵamda jaýapty ata-ana bolý mádenıetin qalyptastyrýǵa, urpaqtar sabaqtastyǵyn saqtaýǵa jáne otbasy qundylyqtaryn dáripteýge zor úles qosyp keledi. Munyń bári – ár shańyraqtyń berik, ár balanyń baqytty, ár otbasynyń qamqor ortada ómir súrýi úshin jasalyp jatqan mańyzdy qadamdar», dedi ol.
Qostanaıda otbasylyq ǵylymı-ınnovasııalyq festıval ótip jatyr
Sonymen qatar aıtýly merekege oraı, búginnen bastap «Mereıli otbasy» konkýrsyna ótinim qabyldanatynyn eskertti.
«Qymbatty dostar! Búgin, Halyqaralyq otbasy kúni, elimizde dástúrli «Mereıli otbasy» ulttyq konkýrsyna ótinim qabyldaý bastalady. Bul baıqaý – ónegeli ómiri, eńbegi, tatýlyǵy, urpaq tárbıesindegi úlgisi arqyly kópke jol kórsetip júrgen otbasylardy tanytatyn erekshe joba», dedi A. Balaeva.
Mınıstr otbasylardy osy konkýrsqa belsendi qatysýǵa shaqyryp, ár shańyraqqa amandyq, tatýlyq pen bereke tiledi.
