Foto: Ashyq derekkóz
Eksport kólemi eselep ósti
2025 jyldyń qorytyndysy boıynsha shetelge 1 477 tonna bal jóneltildi. 2024 jyly bul kórsetkish nebári 603 tonna bolǵan edi.
Negizgi eksporttyq baǵyt – О́zbekstan. Bul elge 1 264 tonna, ıaǵnı jalpy kólemniń 85,6 %-y tıesili. Sonymen qatar otandyq bal Kanada, Qytaı, Saýd Arabııasy, Reseı jáne Amerıka Qurama Shtattaryna eksporttaldy. Bıyl alǵash ret Omanǵa da ónim jetkizildi.
Syrttan bal ákelý kólemi kerisinshe kúrt azaıdy: 2024 jylǵy 1 663 tonnadan 262,4 tonnaǵa deıin tómendedi. Bul ishki óndiristiń ulǵaıyp, otandyq óndirýshilerdiń naryqtaǵy orny nyǵaıǵanyn ańǵartady.
О́ndiristik áleýet
Qazir Shyǵys Qazaqstan, Pavlodar, Almaty, Túrkistan, Abaı jáne Jetisý oblystarynda 241 myń ara uıasy tirkelgen. Onyń 90,2 myńy – asyl tuqymdy.
Elimizde jyl saıyn shamamen 5 myń tonna bal óndiriledi. Sonyń 46,5 %-y (2,3 myń tonna) – jeke qosalqy sharýashylyqtardyń úlesinde bolsa, 54%-y (2,7 myń tonna) – aýyl sharýashylyǵy taýar óndirýshilerine tıesili.
Memlekettik qoldaý jáne zańnamalyq negiz
Memlekettik qoldaý aıasynda bal óndirisiniń shyǵynyn azaıtý maqsatynda ótkizilgen ár kılogramm ónimge 200 teńge sýbsıdııa qarastyrylǵan.
Salany júıeli damytý úshin 2025-2027 jyldarǵa arnalǵan jol kartasy bekitildi. Sonymen qatar «Ara sharýashylyǵy týraly» jáne «Asyl tuqymdy mal sharýashylyǵy týraly» zańdarǵa ózgerister ázirlenip, 2025 jylǵy sáýirde Parlament qaraýyna usynyldy.
Osy jyldyń 11 aqpanynda ara sharýashylyǵy máseleleri boıynsha zań jobasyn talqylaıtyn jumys tobynyń alǵashqy otyrysy ótti.
Qabyldanatyn túzetýler saladaǵy eseptiliktiń ashyqtyǵyn arttyrýǵa, óndiris tıimdiligin kúsheıtýge jáne otandyq baldyń syrtqy naryqtaǵy básekege qabilettiligin nyǵaıtýǵa baǵyttalǵan. Bul óz kezeginde eksport kólemin ulǵaıtyp, aýyldyq aýmaqtardyń ekonomıkalyq damýyna tyń serpin bermek.
