Izraılde premer-mınıstr Bınıamın Netanıahýdiń Qazaqstanǵa sapary qorytyndylandy, dep jazady VVS.
"Izraıl premer-mınıstri eki eldiń arasyndaǵy dıplomatııalyq qarym-qatynas ornaǵan 25 jyldyń ishinde alǵash ret Qazaqstanǵa bardy. Ekijaqty kelisimderden basqa Astanadaǵy kezdesýde Izraılge Iran Islam Respýblıkasynyń qarym-qatynasy talqylanǵan bolatyn", - dep jazady basylym.
"Men Iran prezıdentine suraq qoıǵym keledi: Nege sizder bizdiń memleketke qoqan-loqy jasaısyzdar? Eger Iran Izraıldi kishkentaı jáne qorǵansyz memleket dep oılasa, olar qatty qatelesedi. Sondyqtan, Iran tarapyna qarym-qatynasymyzdy ýshyqtyrmaýǵa keńes beremin", degen bolatyn Netanıahý Astanadaǵy baspasóz konferensııasynda. Netanıahý Nursultan Nazarbaevtyń "Irannyń qoqan-loqysyna senesizder me?" degen suraǵyna Tegerannyń kózqarasy ózgerip jatsa, tek qana qýanatynyn jetkizgen bolatyn. Sonymen qatar ol atalǵan jıynda Qazaqstan prezıdentine BUU Qaýipsizdik keńesine múshelik etý úshin Izraıldiń kandıdatýrasyn qoldaýdy surady. VVS-diń jazýynsha, Netanıahýdiń Aqordada Nursultan Nazarbaevpen kezdesýinde kótergen basty taqyryptar arasynda ekonomıkalyq qarym-qatynas ornatý men Qazaqstannyń iri energetıkalyq kompanııalaryn Izraıl naryǵyna jáne gaz alý isine tartý boldy. Sonymen qatar Izraıl Qazaqstanmen qarym-qatynas ornatýǵa tartymdy salalar qatarynda aýyl sharýashylyǵy, ǵylym men lańkestikke qarsy kúres bar ekenin aıtty. Sapardy qorytyndylaý barysynda sarapshylar Netanıahýdiń Ortalyq Azııaǵa sapary tek ekonomıkalyq emes, dıplomatılyq maqsatta da bolǵan dep otyr. Iаǵnı, Izraıl premer-mınıstri tek ekijaqty kelisimsharttarǵa qol qoıýdy ǵana emes, halyqaralyq arenada Qazaqstan jáne Ázerbaıjannyń qoldaýyna ıe bolýdy maqsat tutqan. Esterińizge sala ketsek, Netanıahý Astanadaǵy jıynda "Biz júzege asyrmaq taǵy bir joba - Qazaqstan men Izraıl arasynda tikeleı áýe reısterin ashý. Adamdar eki el arasynda erkin qatynaýǵa múmkindik alýy kerek", degen bolatyn.
