Shahan kentindegi jaǵdaıǵa baılanysty jedel shtab otyrysy ótti

Oblys ákimi Shahan kentinde oryn alǵan tótenshe oqıǵa jóninde jedel shtab otyrysyn ótkizip, Shahtınsk qalasy ákiminiń (Shahan kenti osy qalaǵa baǵynyshty) jáne tıisti qyzmet túrleri ókilderiniń esepterin tyńdady. Otyrys barysynda qutqarýshylardyń apat ornyna dabyl qaǵylǵannan keıin tórt mınýt ishinde jetkeni aıtyldy. Oblys basshysy qutqarýshylardyń jádel ári jınaqy jumys istegenin atap ótti. Qazirgi tańda jylý qazandyǵy jarylǵan úıde Qazaqstan qaıta qurý jáne damý kópsalaly ınstıtýty (QazQDKI) zertteý júrgizip jatyr. Mekeme basshysy Jumaǵul Nýgýjınovtiń aıtýynsha, bul jumystar eki kúnniń ishinde aıaqtalýy tıis. Jarylys bolǵan úıdi ári qaraı paıdalaný múmkindigi týraly sheshim qabyldaý jáne onyń qıraǵan bóligin buzý QazQDKI sarapshylarynyń sarapshylarynyń qorytyndysynan keıin ǵana belgili bolady. Al tehnogendik sıpattaǵy tótenshe oqıǵa saldarynan kelgen zardaptyń mólsherin anyqtaý úshin arnaıy komıssııa qurylǵan. Budan buryn habarlaǵanymyzdaı, qaza bolǵandardy jerleý rásimine ketetin shyǵyndardy Qaraǵandy oblystyq ákimdigi óz moınyna aldy. Sondaı-aq, jergilikti bılik árbir qaıtys bolǵandar úshin 1 mln teńge, al zardap shekkenderdiń árqaısyna 500 myń teńge kóleminde materıaldyq kómek kórsetedi. Sonymen qatar, basyna is túsken turǵyndarǵa kómek uıymdastyrý úshin Shahan kentinde gýmanıatrlyq kómekti qabyldaıtyn arnaıy beket ashyldy. Munda Qyzyl jarty aı qoǵamynan azyq-túlik jetkizildi, sondaı-aq kásipkerler men turǵyndardan zattaı kómek túrleri túse bastady. Jaqyn arada zardap shekkenderge qarjylaı kómek kórsetý maqsatynda qoǵamdyq qor qurylmaqshy. Budan bólek, óńir basshysy oblystaǵy avtonomdyq jylý júıesi jáne jeke qazandyqtary bar basqa da kópqabatty úılerdiń barlyǵyna zertteý júrgizý týraly tapsyrma berdi. Qaırat Ábildınov, «Egemen Qazaqstan»