Jeltoqsanda kúnkóristiń eń tómengi deńgeıi 21 513 teńgeni qurady

2016 jylǵy jeltoqsanda kúnkóristiń eń tómengi deńgeıi 21 513 teńgeni qurady, dep habarlaıdy Ulttyq ekonomıka mınıstrligi. «Negizgi tamaq ónimderin tutynýdyń eń tómengi normalarynan eseptelgen orta eseppen halyqtyń jan basyna shaqqandaǵy kúnkóristiń eń tómengi deńgeıiniń shamasy 2016 jylǵy jeltoqsanda qarashamen salystyrǵanda 1,7, al 2015 jylǵy jeltoqsanmen salystyrǵanda 8,6 paıyzǵa joǵarylady. Onyń qurylymynda et pen balyqty satyp alýǵa jumsalǵan shyǵystardyń úlesi 21, sút, maı jáne toń maı ónimderi men jumyrtqaǵa  17,8, jemister men kókónisterge  9,5, nan jáne jarma ónimderine  8,9, qant, shaı jáne dámdeýishterge  2,8 paıyzdy qurady», - delingen QR Ulttyq ekonomıka mınıstrligi taratqan aqparatta. Aıta keteıik, eń tómengi kúnkóris deńgeıi  mólsheri boıynsha eń tómengi tutyný qorjynynyń qunyna teń, bir adamǵa qajetti eń tómengi aqshalaı tabys. Eń tómengi tutyný qorjyny adam tirshiligin qamtamasyz etýge qajetti tamaq ónimderiniń, taýarlar men kórsetiletin qyzmetterdiń zattaı jáne qundyq kórinistegi eń tómengi jıyntyǵy bolyp tabylady. Ol azyq-túlik qorjynynan jáne azyq-túlik emes taýarlar men aqyly qyzmetterge jumsalatyn shyǵystardyń bekitilgen úlesinen turady. Kúnkóristiń eń tómengi deńgeıin esepteýge arnalǵan az tutynylatyn azyq-túlik emes taýarlar men kórsetiletin qyzmetterge jumsalatyn shyǵystardyń úlesi eń tómengi tutyný qorjyny qunynyń 40 paıyzdyq mólsherinde belgilengen.