Bleacher Report: Djeıkobstyń bir nokaýty Golovkınniń 36 jeńisinen artyq (vıdeo)

WBA (Super), IBO, WBC jáne IBF tujyrymdary boıynsha orta salmaqta álem chempıony Gennadıı Golovkın men WBA tıtýlynyń ıegeri Denıel Djeıkobs kezdesýi Bleacher Report portalynyń nusqasy boıynsha 2017 jyly ótetin úzdik on oqıǵanyń birine endi. Bul týraly vesti.kz habarlady. «Buǵan deıin jeńilip kórmegen Gennadıı Golovkınniń nokaýt serııasy 23-ke jetti. Ol pound-for-pound juldyzy jáne álemdegi tanymal boksshylardyń biri. Biraq onyń bul jolǵy qarsylasy osal emes ekenin eskerý qajet. Kell Brýkpen ótken kezdesýden soń jankúıerlerdiń kóńilinde bir kúdiktiń qalǵany belgili. Bálkim, sol aıqasta brıtanııalyq bastapqy úsh raýndta jeńiske jetken bolar!? Denıel Djeıkobs – 160 fýntta ekinshi nómirli boksshy. Degenmen, 2015 jyly Pıter Kýıllındi birinshi raýndta-aq sulatyp túsirgeni Golovkınniń 36 jeńisinen de artyq. Amerıkalyq talantty boksshylardyń biri. Ol asqan jyldamdyqqa ıe ári soqqylary da aýyr. Naýryz aıyndaǵy kezdesýde Golovkınniń favorıt ekeni sózsiz. Biraq dál sol kúni Dennıdiń apset (eshkim kútpegen nátıje) jasaı alatynyna senetinderdiń qatary az bolatyny ókinishti», – dep jazady atalǵan portal. Aıta keteıik, qos sportshynyń arasyndaǵy kezdesý 18 naýryzda AQSh-tyń Nıý-Iork qalasyndaǵy Madison Square Garden arenasynda ótedi.