Qyrǵyzstan prezıdenttiginen úmitkerlerdiń búgingi kúnge deıin tirkelgeni 67 adam bolyp otyr. Keshe eldiń ortalyq saılaý komıssııasy memlekettik tilden emtıhan berý syzbasyn jasady.
Ázirge onyń tizimine 12 adam ǵana engizildi. Bular kandıdattyqqa ótý úshin zań talabyna sáıkes 100 myń som kepildik jarna men ózderin keminde 30 myń adamnyń qoldaıtyndyǵy jóninde qaǵaz tapsyrǵandar. Qalǵandarynyń qaı kúni emtıhan tapsyratyndyǵy osy eki talapty oryndap, tizimge engizilgen soń ǵana belgili bolady.
Taǵy da aýyr lańkestik jasaldy
Keshe Úndistan astanasynda 2008 jyly Mýmbaıda bolǵan teraktiden keıingi úlken lańkestik jasaldy. Joǵarǵy sottyń aldyna qastandyqpen «umytylyp» qaldyrylǵan portfeldegi jarylǵysh zattar 10 adamnyń ómirin qıyp, 47 janǵa jaraqat saldy.
Teraktiniń jaýapkershiligin Úndistan, Pákstan men Bangladeshte áreket etetin «Harkat-ýl Jıhad ál-Islamııa» uıymy moınyna alyp otyr. Onyń ókili elektrondy poshta arqyly osyndaı habar túsirgen. Ol BUU-nyń 2010 jylǵy sheshimi boıynsha tyıym salynǵan uıymǵa jatady.
Qaıda ekeni áli naqty belgisiz
Lıvııa kóterilisshileri keshe Mýammar Kaddafıdiń qaı jerde jasyrynyp jatqanyn taýyp, sol aımaqty qorshaýǵa aldyq dep jarııalady. Habardy taratqan О́tpeli ulttyq keńes áskerı komandovanıesiniń ókili Anıs Sharıft biz endi Kaddafıdi ne tiri, ne óli kúıinde báribir qolǵa túsiremiz dep masattandy. Biraq polkovnıktiń naqty qaı jerde jasyrynǵanyn aıtpady.
Budan buryn M.Kaddafıge senimdi áskerlerdiń qorshaýyndaǵy bronemashınalar Nıgerııanyń shekarasynan ótken. Kaddafı solardyń birinde bolýy kerek, osy el arqyly ol ózine saıası baspana beretin Býrkına Fasoǵa ótedi dep jarııalanǵan. Biraq Býrkına Faso ókili bul málimettiń jalǵan ekenin jarııalady. Kim bilsin?
Kimdiki durys, kimdiki burys
О́zbekstannyń ekologııalyq qozǵalystary BUU Bas Assambleıasyna tájiktiń alıýmınıı kompanııasy – GÝP TALKO-nyń ústinen shaǵym túsirdi. Onda ekologtar atalmysh kompanııanyń áreketinen qorshaǵan ortaǵa orasan zııan kelip otyrǵanyn aıtyp, ony anyqtaý úshin halyqaralyq sarapshylar komıssııasyn uıymdastyrýdy ótinedi.
Al Tájikstan jaǵy muny kúlkige aınaldyryp, basy aýytqyp ketken adamdardyń sandyraǵy dep málimdedi. Sebebi, deıdi olar, alıýmınıı zaýytynan shyǵatyn qoqystyń zııandylyǵy ruhsat etilgen normadan áldeneshe ese az. Saıyp kelgende, bul saıası oıyn ekenin bárimiz bilip turmyz, delingen olardyń málimdemesinde.
Gaz máselesi sheshimin tabar emes
Ýkraına men Reseıdiń gaz problemalary tóńiregindegi kıkiljińderi jalǵasyp keledi. Ýkraına jaǵy Reseımen kelisimge qol qoıǵan «Naftegaz» holdıngin taratý arqyly mindettemeden qutylýdy kózdep otyr.
Keshe Ýkraınanyń otyn jáne energetıka mınıstri Iýrıı Boıko holdıngtiń quramyndaǵy kompanııalardyń aksııalaryn satý arqyly memlekettik bıýdjetke 10-12 mlrd. dollar túsim kiretinin málimdedi. Ázirge kompanııalardyń aksııalaryn baǵalaý jumystary júrgizilýde, al aýksıon 2012 jyldyń basynan bastap ótkizilmekshi. Biraq Reseı jaǵy ózderin aldarqatqysy keletin mundaı áreketterge jol bergisi joq. Olar qol qoıylǵan mindettemelerdiń oryndalýyn úzildi-kesildi talap etýde.
Tabıǵat qahary tolastamaı tur
Japonııada bolǵan «Talas» taıfýnynyń zardaby áli tolyq eńserilgen joq. Sekýndyna 30 metr jyldamdyqpen soqqan daýyl men qalyń nóserdiń kesirinen joldar buzylyp, sel júrgen edi. Keıbir ózender arnalarynan asyp ketken.
Qazir taıfýnnyń lańynan 50-den astam adamnyń qaza bolyp, 55 adamnyń iz-túzsiz joǵalyp ketkeni belgili bolyp otyr. Ondaǵan eldi mekender áli kúnge sý júrip ketken joldardyń ortasynda qalyp, olarmen baılanysqa shyǵý qıyndaǵan. Qaıyrymdylyq kómekteri áýe joldary arqyly jetkizilip, qorshaýdaǵy jandardy ajaldan qutqarýda. Japon halqy ózderine bıyl qandaı qarǵystyń tıgenin bile almaı dal.
Qysqa qaıyryp aıtqanda:
*Máskeýdiń Manej alańynda byltyr 5 myńdaı adam qatysqan tóbeles ashyp, buzaqylyq jasaǵan tobyrdyń basshylaryna sot prosesi bastaldy. Bes adamnan turatyn olar «Drýgaıa Rossııa» oppozısııalyq birlestiginiń músheleri eken.
*Gaaga halyqaralyq trıbýnaly Iýgoslavııanyń bas shtabynyń burynǵy bastyǵy M.Pershıchti 27 jylǵa bas bostandyǵynan aıyrý týraly úkim shyǵardy. Ol S.Mıloshevıchtiń oń qoly bolyp júrgende 13 ret qasapty qylmystardy uıymdastyrýǵa qatysypty.
*Japonııanyń jańadan taǵaıyndalǵan premer-mınıstri Iosıhıto Noda Reseı Federasııasynyń prezıdenti D.Medvedevpen telefon arqyly sóılesken. Onda «soltústik aýmaqtardyń» problemasyn tezirek sheshý eki jaqqa da tıimdi ekendigi aıtylsa kerek.
*Fransııa prezıdenti N.Sarkozıdiń reıtıngi sońǵy kezde ósip, ony qoldaýshylar úlesi 37 paıyzǵa deıin artqan. Onyń sebebin mamandar fransýzdardyń kóbi prezıdenttiń M.Kaddafıge qarsy jasaǵan áreketterin qoldaýynan, el bıýdjeti tapshylyǵynyń tómendeýinen jáne áıeli K.Brýnonyń ekiqabat bolǵandyǵynan dep otyr.
Internet materıaldary negizinde ázirlendi.
